अमेरिकी जेलय् मेम्ह आप्रवासी मचा सित

अमेरिकाया प्रहरी थुनाय् ग्वाटेमालाया छम्ह च्यादँ दुम्ह मचा सिउगु दु । थ्व लछिया दुने अमेरिकाया जेलय् मचा सीगु थ्व निगूगु घटना खः । वंगु डिसेम्बर ८ य् ग्वाटेमालाया हे छम्ह च्यादँ दुम्ह मिसामचा ज्याकलिन काल सीगु खः । मेक्सिकोपाखें अमेरिका दुहां वयेत्यंगु इलय् म्हिगः सीम्ह मचायात वया अबुलिसें अमेरिकी सीमा सुरक्षा निकायं ज्वंगु खः ।

मचा बिरामी जूगु सिइवं सीमा सुरक्षा निकायं मचायात न्यू मेक्सिको मेडिकल सेन्टरय् उपचारया निंतिं यंकागु खँ धाःगु दु । चिकुया ज्वरो वःगु धासें मचायात अस्पतालय् उपचार याःगु खःसां चान्हय् जूबलय् मचा सीगु खः । ग्वाटेमालाया सरकारं मचा सीगु बारे विस्तृत अध्ययन यायेत अमेरिकी सरकारयात इनाप याःगु दु ।

मचा सिइवं सामाजिक सञ्जालय् अमेरिकी अधिकारीतय् तच्वःगु आलोचना सुरु जूगु दु ।‘अमेरिकी प्रशासन दुने हे मेम्ह छम्ह मचाया ज्यान वंगु दु’ टेक्सासया डेमोक्रेटिक कंग्रेस दुजः मार्क भेसीं ट्विट यासें धाःगु दु ।अथेहे न्यू मेक्सिकोया सिनेटर मार्टिन हेनरिकं ट्विट यासें धाःगु दु, ‘थ्व समाचारं तसकं दुःखीत व विचलित यानाबिउगु दु । थ्व घटना बारे विस्तृत जानकारी तुरुन्त बीमाः व ट्रम्प प्रशासनयात मचाया मृत्यु बारे जवाफदेही दयेके हे माः । ’