हाइटीया राष्ट्रपतिया हत्याय् कोलम्बिया व अमेरिकी नागरिकतय् ल्हाः

एजेन्सी- हाइटीया राष्ट्रपति जोभोनेल मोइजया हत्याय् विदेशी पुचःया ल्हाः दुगु हाइटीया प्रहरीं धाःगु दु । आक्रमणय् कोलम्बिया व अमेरिकाया नागरिक संलग्न दुगु प्रहरीया दावी दु ।

हाइटीया प्रहरी प्रमुख लियोन चाल्र्सया कथं आक्रमणय् कोलम्बियाया पूर्व सैनिकतय् नं ल्हाः दु । प्रहरी प्रमुख लियोनं आक्रमणय् २६ म्ह कोलम्बियाली व निम्ह अमेरिकी संलग्न दुगु खँ नं धयादीगु दु । घटनाया थप जानकारी बिसें प्रहरीं आक्रमणय् ल्हाः दुपिं १७ म्हेसित ज्वनेधुनागु व च्याम्ह फरार जुयाच्वंगु धाःगु दु । मेपिं स्वम्ह प्रहरीनाप जूगु भिडन्तय् गोली लानाः सीगु खः । प्रहरीं आक्रमण याःपिनिगु हतियार व पासपोर्ट नं सार्वजनिक याःगु दु । प्रहरीं फरार जुयाच्वंपिंत नं याकनं हे ज्वनेगु धाःगु दु । आक्रमण सुनां याकूगु व छाय् यात धयागु धाःसा सीमदुनि ।

कोलम्बियाया सरकारं आक्रमणय् दुथ्याःपिं मध्ये खुम्ह कोलम्बियाया अवकाश कायेधुंकूपिं सैनिकत खः धाःगु दुसा अनुसन्धानय् ग्वाहालि यायेगु नं धाःगु दु । अमेरिकां धाःसा नवाःगु मदुनि ।

वंगु मंगलवाः हाइटीया राष्ट्रपति मोइजयात वय्कःया हे निवासय् गोलीं कयेकाः स्यानाबिउगु खः । आक्रमणय् लानाः मोइजया कलाः नं घाःपाः जूगु खःसा आः वय्कःयात फ्लोरिडाय् वासः याकातःगु दु ।