जाम व्यवस्थापनय् सहयोगी पिक एण्ड ड्रप

येँ महानगरपालिकां थ्व हे वंगु पुस १ गतेनिसें न्ह्याकूगु ‘पिक एण्ड ड्रप’ ज्याझ्वलं ट्राफिक जाम म्हो जूगु न्ह्यथंगु दु । न्हापांगु चरणय् तिंख्यः व उकिया जःखः, लुँमधि (भद्रकाली), रत्नपार्क, शहीदगेट लगायतया थासय् शुरु याःगु ज्याझ्वः प्रभावकारी जूगुलिं यात्रु व चालक निम्हेसितं फाइदा जूगु दु ।

थःगु गन्तव्यय् वनेत ताःईतक पिया च्वनेमालीगुलिं यात्रुयात नं सास्ती व चालकं नं ताःईतक छगू हे थासय् ई छ्यानाच्वनीबलय् ट्राफिक जामलिसे ईया बर्बाद जुइगुलिं थज्याःगु समस्याया समाधान जुयाः प्रभावकारीता अप्वया वंगु खः ।

येँ मनपाया प्रवक्तालिसें वडा नं. १५ या वडाअध्यक्ष ईश्वरमान डंगोलया कथं येँया नुगःचु कथं कयातःगु थ्व क्षेत्रय् सार्वजनिक सवारी साधनं यात्रुत पियाच्वनेत ताःईतक च्वनाच्वनीगुलिं सवारी साधन पियाच्वनीपिं यात्रु, लँजुवाः व वातावरणतकं प्रदूषित जुइगु जूगुलिं उकथंया व्यवस्था याःगु खः ।

ज्याझ्वः प्रभावकारी जूगुलिं जमः, त्रिपुरेश्वरनिसें लुँहिति, रत्नपार्क, भोताहिति लगायतया थासय् सवारी जाम मजूगु महानगरया धापू दु । नियमया पालना मयाइपिं चालक वा सहचालकयात कारवाही यायेगु धाःसां इमिसं इमान्दारीपूर्वक पालना याःगुलिं आतक सुं नं कारवाहीलय् मलाःगु महानगरं न्ह्यथंगु दु ।

भ्वत, ख्वप, नागढुंगा, च्वबहाः वनीगु ताःहाकःगु दूरीया बसं ताःईतक हे यात्रुत पियाच्वनीगु जूगुलिं ‘पिक एण्ड ड्रप’ ज्याझ्वःयात छुं समस्या जुया बिउगु दु । पूर्णरुपय् थ्व ज्याझ्वः प्रभावकारी दयेकेत महानगरं छुं छुं सीमित थासय् जक मखसे येँ महानगर लागाया मेमेगु थासय् व मेमेगु नगरपालिका व महानगरपालिकाया सहकार्यय् थ्व ज्याझ्वःयात स्वनिगःन्यंकं न्यंका यंकेमाःगु यात्रुतय् धापू दु ।

न्हियान्हिथं नागढुंगानिसें न्हूसतकया छगू ज्याकुथिइ ज्या याइम्ह शान्ता अधिकारीं धयादिल, ‘येँया जामया समस्या चिइकेगु खः धइगु जूसा सीमित छुं छुं थासय् जक थज्याःगु ज्याझ्वः हयां मजिउ, स्वनिगःन्यंकं थ्व ज्याझ्वःयात विस्तार यायेमाःगु आवश्यक दु । वय्कःयाकथं दक्वं थासय् व्यवस्थापन मजुइगु खःसा छगू थासय् खने दयाच्वंगु समस्या मेगु थासय् यंकाः क्वचिनेगु ज्या जक जुइ, थुकिं समस्या गथे खः अथे हे जुइ ।

यात्रुतय्सं थथे धयाच्वंगु इलय् येँ मनपाया प्रमखु विद्यासुन्दर शाक्यं धाःसा न्हापांगु चरणय् जक छुं छुं थासय् थ्व ज्याझ्वः शुरु यानागु व आः वइगु छुं दिंया दुने हे नागरिकया भावनाकथं मेमेगु स्थानीय निकायलिसेया सहकार्यय् स्वनिगःन्यंकं यंकेगु जुइ धयादिल । वय्कलं धयादिल, ‘न्हापांखुसी शुरु यानागु ज्याझ्वः जूगुलिं लछि–निला तक थुकिया प्रभावकारीता स्वयाः मेमेगु थासय् नं विस्तार यायेत येँ मनपा सक्रिय दु ।’

येँय् कलंकी, ल्हुति चोक, चाबही, कोटेश्वर, सातदोबाटो, माइतीघर, थापाथली लगायतया थासय् वये वने यायेबलय् यात्रुतय्सं ट्राफिक जामया समस्या फयेमाःगु न्हूगु खँ मखये धुंकल । न्हिंन्हिं हे घन्टौं तक जाम लायेमाःगु समस्याया कारण. नागरिकं थःगु ज्या कः घायेत बाध्य जुयाच्वंगु दु ।

उलि जक मखसे आपालं थासय् लँजुवाःतय् निंतिं लँ त्वाः ल्हायेत आकाशे ताँ मदु दुगु थासय् नं जेब्रा क्रसिंग स्पष्ट खने मदु । वंगु साउन महिनाय् येँ मनपां च्यागू थासय् स्थानान्तरण याये फइगु आकाशे ताँ निर्माण यायेगु तयारी याःगु उगु ज्यां आतक नं गति काये धाःसा फयाच्वंगु मदुनि ।

येँ मनपां चालु आर्थिक दँ ०७÷७६या निंतिं झिंस्वंगू अर्ब निगू करोड १२ गू लाखया बजेट न्ह्यब्वःगु खः । थ्व अन्तर्गत भौतिक पूर्वाधारया विकास व निर्माणया निंतिं चालु आर्थिक दँय् ४ गू अर्ब ६ गू करोड बजेट विनियोजन याःगु दु ।

येँ महानगपालिका दुने करिब १,४५० किलोमिटर पक्की सतक दु । येँ मनपायात ८ मिटर स्वयाः म्हो ब्या दुगु सतक जक मर्मत यायेगु अधिकार दु । व स्वयां च्वयेया सतकय् ज्या यायेत सडक विभागलिसें सहकार्य यानाः ज्या यायेमाः । येँ मनपा दुने ८ मिटर स्वयां म्हो ब्या दुगु सतक ९५० किलोमिछर दु । येँ मनपा दुने ६२ मिटर ब्याया सतक तकं दु ।