लामिछाने विरुद्ध नं छानबिन जुइमाःगु माग

येँ (नेपालभाषा टाइम्स)- सहकारी पीडिततय्सं उपप्रधान लिसें गृहमन्त्री रवि लामिछानेया विषयय् समेत छानबिन यायेत माग याःगु दु । म्हिगः सहकारी संस्था बचत दुरुपयोग संसदीय छानबिन विशेष समितिइ थःगु खँ तयेगु झ्वलय् पीडिततय्सं उगु माग याःगु खः ।

पीडिततय्सं सहारा बहुउद्देश्यीय सहकारीया ध्यबा गोर्खा मिडिया नेटवर्कय् १ अर्ब स्वयां अप्वः लगानी जूगु धासें गोर्खा मिडिया नेटवर्कया प्रबन्ध निर्देशक गृहमन्त्री लामिछानेयात ज्वनाः छानबिन यायेमाःगु माग याःगु खः ।

सहकारी कानुन अःखः गोर्खा मिडियाय् लगानी याःगु धासें उमिसं थ्व अपचलन याःम्ह गृहमन्त्री हे जूसां नं अनुसन्धान यानाः कारबाही यायेत माग याःगु खः । थ्वहे झ्वलय् संसदीय छानबिन समितिं जेलय् लानाच्वंपिं सहकारी सञ्चालकतलिसे नं न्यनेकने याइगु जूगु दु । अथे हे सरकारीया ध्यबा ठगे यानाः विदेशय् बिसिउँ वनाच्वंपिंत ज्वनाः नेपालय् हयेगु नितिं प्रधानमन्त्रीयात माग यायेगु नं समितिं यानाच्वंगु दु ।

थ्वहे झ्वलय् रास्वपापाखें निष्काशित जूम्ह उगु पार्टीया पूर्व महामन्त्री मुकुल ढकालं सहकारी ठगी काण्डय् रास्वपाया अध्यक्ष रवि लामिछानेयात कारवाही यायेमाःगु खँ धयादीगु दु । पार्टीपाखें निष्काशित जुइवं म्हिगः पत्रकार सम्मेलन यासें वय्कलं थ्व माग यानादीगु खः ।