बागमतिं लः हयेगु योजना फास्ट ट्य्राकय्
येँ (नेपालभाषा टाइम्स) – खुसिबाःया कारणं मेलम्ची खुसिया लः छ्वयाहयेगु दिकेवं काठमाडौं उपत्यका खानेपानी लिमिटेड (केयुकेएलं) लःया वैकल्पिक स्रोत छ्यलाः स्वनिगःया लःया समस्या ज्यंकेगु प्रक्रिया न्ह्याकूगु दु ।
संसदया पूर्वाधार विकास समितिया म्हिगः च्वंगु बैठकय् केयुकेएलया कार्यकारी निर्देशक रामरतन साहं थ्व बारे जानकारी बियादीगु खः । वय्कःया कथं शिवपुरीस्थित बागमति खुसिं थप लः हयेगु योजना केयुकेएलया दु ।
मेलम्चीं न्हिं १८ निसे २० करोड लिटर लःया आपूर्ति जुयाच्वंगु खः । थ्व आपूर्ति बन्द जुइवं केयुकेएलं शिवपुरीया बागमति खुसिं लः हयेगु तयार याःगु खः । तर थ्व योजना न्यादँ खुँद न्ह्यःया योजना खः, आः थुकिया ज्याय् तीव्रता बिउगु खँ वय्कलं धयादीगु दु ।
वातावरणीय प्रभाव मूल्यांकन (ईआईए) प्रतिवेदन व भाःया समस्याया कारणं दिनाच्वंगु उगु आयोजना मंगलवाः च्वंगु बैठकं ईआईए प्रतिवेदन स्वीकृत यायेवं ‘फास्ट ट्राय्कं’ ज्या न्ह्याकूगु जानकारी नं वय्कलं बियादीगु दु । उगु खुसिं थौंकन्हय् २ करोड लिटर लः आपूर्ति जुयाच्वंगु व आः थप पाइपलाइन विस्तार यानाः क्षमता अप्वयेकेत्यनागु जानकारी नं वय्कलं बियादीगु दु ।
न्हापाया १४ इन्चया पाइप लिसे थप २० इन्चया न्हूगु पाइप तयेगु ज्या वंगु मंगलवाः निसें न्ह्यायेधुंकूगु जानकारी नं वय्कलं बियादीगु दु । उगु आयोजनाया निंतिं माःगु २०० मिटर डीआई पाइप संस्थायाके दुगु व ल्यं दनिगु ५० एमएया एचडीपीई पाइप न्यायेगु तयारी जुयाच्वंगु जानकारी नं वय्कलं समितियात याकूगु दु ।
वय्कःया कथं लछिया दुने ज्या क्वचायेकाः थप ४ निसें ५ करोड लिटर लः आपूर्ति यायेगु लक्ष्य तयातःगु दु ।
LEAVE YOUR COMMENTS