सम्पत्ति शुद्धिकरण आयोगय् झिंन्यासः उजुरी, प्रारम्भिक छानविन न्ह्यात : आयोग
येँ (नेपालभाषा टाइम्स) – सम्पत्ति छानबिन आयोगं थःथाय् वःगु उजुरीयात कयाः प्रारम्भिक चरणया ज्या न्ह्याकूगु दु । वंगु शुक्रवाः निसें आयोगय् लाःगु १ हजार ५ सय उजुरीया फाइल चायेकाः छानबिनया ज्या न्ह्याकूगु खँ आयोगया प्रवक्ता गणेश केसीं कनादीगु दु । वय्कःया कथं ४ सय फाइलया प्रारम्भिक अध्ययन जुइधुंकूगु दु । प्रारम्भिक चरणया ज्या क्वचायेवं आयोगं विस्तृत रुपय् छानबिन प्रक्रिया न्ह्याकी ।
थौंकन्हय् बहालवाला कर्मचारी, राजनीतिक दलया उच्च पदस्थ नेता, पुलांपिं मन्त्री, बहालवाला न्यायाधीश, संस्थानय् सरकारपाखें नियुक्त जूपिं पुलांपिं सल्लाहाकार, वित्त सल्लाहकारतय् विरुद्ध छानबिन आयोगय् अप्वः उजुरी लानाच्वंगु दु । सम्पत्ति विवरण बुझे याःपिं व्यक्ति व लाःगु उजुरीयात छथाय् तयाः छानबिन प्रक्रिया न्ह्याकेगु तयारी आयोगं यानाच्वंगु जानकारी नं प्रवक्ता केसीं बियादीगु दु ।
प्रवक्ता केसीं धयादिल, ‘पुलांपिं मन्त्रीया थःथिति, सवारी चालक, कार्यालय सहयोगी, थःलाःपिनिगु व्यक्तिया सम्पत्ति छानबिन यायेमाः धकाः निवेदन लाःगु दु । प्रारम्भिक रुपय् छानबिन यायेगु झ्वलय् जटिल कथंया विषय नं सम्पत्तिइ स्वानाः वःगु खनेदु । विस्तृत रुपय् छानबिन यायेधुंकाः छुं तथ्य लुइ जुइ ।’ वय्कलं थीथी व्यक्तिया सम्पत्ति शंकास्पद खनेदुगु व स्रोत खुले मजूगु लूसा सरकारयात कारबाहीया सिफारिस यायेगु खँ नं धयादीगु दु ।
प्रवक्ता केसीया कथं सम्पत्ति सुचुकेत थःथितिया नां छ्यःगु आशंका जुल धाःसा आयोगं थःथितिपिनिगु सम्पत्ति विवरण फ्वनेगु व स्वंगू पुस्ता दुनेया थःथिति जूसा वा मेगु सुयागु नामं सम्पति सुचुकूगु संकेत लुतधाःसा अनुसन्धान यायेगु तयारी जुयाच्वंगु दु । थुकथं छानबिन यायेगु झ्वलय् प्रमाणं पुष्टि जुल धाःसा अज्याःपिं थःथितियात नं मुद्दा न्ह्याकेगु खँ वय्कलं धयादीगु दु ।
सम्पत्ति छानबिन आयोगं असार मसान्त तक उजुरी संकलन व सम्पत्ति विवरण बुझे यायेगु ई क्वःछिनातःगु दु । असार मसान्त लिपा सम्पत्ति विवरण बुझे मयाःपिनिगु हकय् तकं आयोगं विस्तृत अनुसन्धान याइगु खँ नं प्रवक्ता केसीं कनादीगु दु । सम्पत्ति विवरण बुझे याःपिनिगु हकय् शेयर डाटा मुंकेगुया लिसें मालपोत, बैंक खाता लगायत संकलन यानाः विस्तृत छानबिन याइगु खँ केसीं कनादीगु दु । छानबिनया झ्वलय् आयोगं व्यक्तिया वैध आय (तलब, भत्ता, बुँज्यां जूगु आय, पैतृक सम्पत्ति, बाः) व मुक्कं सम्पत्तियात कयाः तुलना याइ । यदि वैध आय स्वयां अप्वः सम्पत्ति खनेदत व उकिया स्रोत खुले जुइ मफुत धाःसा उकियात ‘अवैध’ तायेकी ।
उकथं हे आयोगया प्रवक्ता केसीया कथं सम्पत्ति विवरण बुझे मयाःपिं पुलांपिं न्यायाधीशतय्सं असार मसान्त तक सम्पत्ति विवरण बुझे मयात धाःसा विस्तृत छानबिन यानाः प्रतिवेदन तयार यायेगु जानकारी नं बियादीगु दु । प्रवक्ता केसीं धयादिल, ‘पुलांपिं न्यायाधिशतय्सं सम्पत्ति विवरण बुझे मयायेगु घोषणा याःसां नं आः तक सछि मल्याक पुलांपिं न्यायाधीशतय्सं आयोगय् वयाः सम्पत्ति विवरण बुझे यायेधुंकूगु दु ।
LEAVE YOUR COMMENTS