चिडियाखानाय् मृत जीवया प्रतिकृति

जावलाख्यलय् च्वंगु सदर चिडियाखानां अवलोकनकर्ताया निंतिं संरक्षित जीवजन्तुया सीम्हेसिया प्रतिकृति दयेकाः तइगु जूगु दु । चिडियाखानाया व्यवस्थापक प्रमुख डा. चिरञ्जीवी पोखरेलं धयादिल,, ‘थ्व स्वयां न्ह्यः थीथी कारण व उमेर गायेधुंकूपिं सीपिं जनावरया प्रतिकृति दयेकेगु प्रचलन मदु, थ्व न्हापांखुसी यायेत्यनागु खः ।’

चिडियाखानाय् संरक्षित यानाः अवलोकनया निंतिं तयातःपिं जनावर सित धाःसा अज्याःपिं जीवजन्तु व जनावरया दुनेच्वंगु ब्वयात वांछ्वयाः छ्यंगू जक प्रयोग यानाः प्रतिकृति निर्माण याइगु जूगु दु । ‘सीपिं जनावरया प्रतिकृति दयेकेत थाय् निर्माण यायेगु ज्या जुयाच्वंगु दु, छुं ई लिपा उगु थाय् दयेकेगु ज्या सिधइ, तयेगु थाय्या निर्माणलिसें चिडियाखानां व हे महिनांनिसें थःगु ज्या न्ह्याकी’ प्रमुख पोखरेलं धयादिल ।

चिडियाखानाय् तयातःपिं जनावर सित कि न्हापा गज्याःपिं जनावर तयातःगु खः धइगु जानकारी अन स्वःवइपिंसं प्रतिकृतिपाखें सीका काये खनीगु जूगु दु । थाय्या अभाव व न्ह्याबलें दक्वं प्रकारया जनावर मदइगु जूगुलिं नं छु इलय् गज्याःम्ह जनावर सर्वसाधारणया निंतिं तयातःगु खः, आः उम्ह जनावर दु कि मदु धइगु जानकारी अवलोकनकर्तायात बीगु थुकिया मुख्य उद्देश्य जूगु चिडियाखानां न्ह्यथंगु दु ।

दक्वं संरक्षित जीवया प्रतिकृति तये मफुसां नं मुख्य यानाः धुँ, भालु, गैडा, किसि, ह्याउँम्ह पाण्डा, भुतिमाकः, रिङटेल्ड लिमर, म्हय्खा, डाँफे थेंज्याःपिं जनावरया प्रतिकृति दयेकाः तइगु जूगु दु । उगु थाय् चिडियाखानाया टिकट काये थाय् लिक्कं तयेगु क्वःछिनातःगु दु, गन स्वकुमिपिं दुहां वनेवं खंके फइ ।

थौंकन्हय् चिडियाखानाया ६ हेक्टर क्षेत्रफलय् १२७ प्रजातिया १,२१९ जीवजन्त दु । छुं दँ न्ह्यः ८०० जीवजन्तु दुगुलिइ थगुने आपालं झंगःपछि हःगुलिं ल्याः अप्वःगु चिडियाखानाया सूचना अधिकारी लिना चालिसें कनादिल । वंगु आर्थिक दँय् अवलोकनकर्तापाखें झिंप्यंगू करोड तका आम्दानी याःगु चिडियाखानाय् छगू लाख स्वदेशी व विदेशी अवलोकनकर्तात जीवजन्तु स्वयेगु निंतिं वःगु खः ।

चिडियाखाना अवलोकन यायेत १२ दँ क्वय्यापिंत ५०÷–, विद्यार्थीयात १००÷–, सर्वसाधारणत १५०÷–, सार्क राष्ट्रया अवलोकनकर्तायात २२०÷– व मेमेगु देय्या पर्यटकया निंतिं ७५०÷– तका शुल्क क्वःछिनातःगु दु । थ्व स्वयां न्ह्यःया आर्थिक दँय् अवलोकनकर्तापाखें १२ गू करोड आम्दानी याःगु खः ।

तत्कालीन प्रधानमन्त्री जुद्धशम्शेर राणां थःगु निजी प्रयोगया निंतिं निर्माण याःगु खः । चिडियाखाना नीस्वदँ न्ह्यवंनिसें राष्ट्रिय प्रकृति संरक्षण कोष अन्तर्गत व्यवस्थापन जुया वयाच्वंगु दु । थौंकन्हय् चिडियाखानाय् ७५ म्ह कर्मचारी ज्या याना वयाच्वंगु दु । थुकथं हे चिडियाखानां आः जीवजन्तु व जनावरयात यायेमाःगु व्यवहार गज्याःगु जुइमाः धइगु खँइ् शिक्षा बीत ‘जूको साथी’ धइगु ज्याझ्वः शुरु याःगु दु ।

थ्व अन्तर्गत स्वनिगःया न्यासः विद्यालयया ८० म्ह विद्यार्थीं पासाया रुपय् पालंपाः यानाः चिडियाखानाय् च्वंपिं जीवजन्तु व जनावरयात नकेगु व सुसाःकुसाः यायेगु याना वयाच्वंगु सूचना अधिकारी चालिसें कनादि । अथे हे लिपांगु इलय् चिडियाखानां बहनिसिया इलय् नं अवलोकन याये फइगु व्यवस्था याःगु दु ।

थथे बहनिसिया इलय् अवलोकन यायेबलय् थप मनोरञ्जन काये फइगु व धुँ, भालु लगायत झिंप्यता स्तनधारी जनावरया अवलोकन यायेत अवलोकनकर्ता वयेगु यानाच्वंगु चालिसें कनादी । सनिलया ४ः३० निसें बहनि ७ ताःतक अवलोकनया निंतिं ई क्वःछिनातःगु दु । उगु इलय् सछिम्ह तक अवलोकनया निंतिं वयेगु यानाच्वंगु दु ।

सम्बन्धित बुखँ

LEAVE YOUR COMMENTS