
थः मनू लाकेगु लागिं दाहाल व नेपाल दथुइ खँल्हाबल्हा
येँ – वर्तमान मन्त्रिमण्डल पुनर्गठन यायेगु निंतिं नेपाल कम्युनिष्ट पार्टीया शीर्ष नेतातय् दथुइ आन्तरिक सहलह शुरु जूगु दु । मन्त्रिमण्डल पुनर्गठन जुइगु हल्ला जुइवं नेकपाया अध्यक्ष पुष्पकमल दाहाल व वरिष्ठ नेता माधव नेपाल दथुइ सहलह जूगु खः । वय्कःपिनि दथुइ म्हिगः प्रचण्ड निवास खुमलटारय् निघौ तक सहलह जूगु खः ।
मन्त्रिमण्डल पुनर्गठनय् थःगु पक्षया मनूत म्हो जक लाइगु जूगुलिं दाहाल व नेपाल दथुइ सहलह जूगु खः । थ्व स्वयां न्ह्यः प्रम ओलीं थः लिक्क लाःपिं नेतात लिसे सहलह यानादीगु खः । आइतवाः च्वंगु नेकपा सचिवालय बैठकं मन्त्रिमण्डल पुनर्गठन यायेगु निंतिं प्रधानमन्त्री ओलीयात सैद्धान्तिक सहमति बिउगु खः ।
प्रधानमन्त्री ओलीं कार्यसम्पादन मूल्यांकन सन्तोषजनक मदुगु धासें भौतिक पूर्वाधार तथा यातायात मन्त्री रघुवीर महासेठ, खेलकुद मन्त्री जगतबहादुर विश्वकर्मा, उद्योग, वाणिज्य तथा आपूर्ति मन्त्री मातृका यादव, महिला बालबालिका तथा समाज कल्याणमन्त्री थममाया थापामगर, कृषि तथा पशुपंक्षी मन्त्री चक्रपाणी खनालया ज्या सन्तोषजनक मजूगु धासें चीकेत्यंगु खः ।
थ्वहे झ्वलय् थप जुइपिं न्हूपिं मन्त्री कथं सुरेन्द्र पाण्डे, घनश्याम भुसाल, छविलाल विश्वकर्मा, कृष्णगोपाल श्रेष्ठ, महेश बस्नेत, पार्वत गुरुङ, बसन्त नेम्वाङ, पदम गिरी, प्रेम आले, यज्ञराज सुनुवार, गणेश ठगुन्नाया नां चर्चाय् वयाच्वंगु दु । जनार्दन शर्मा, पम्फा भुसाल, देवेन्द्र पौडेल, अग्निप्रसाद सापकोटा, लेखराज भट्ट, हरिराज अधिकारी, प्रभु साहया नां नं न्हूपिं मन्त्रीया धलखय् दुथ्याःगु दु ।
मन्त्री हिलीगु मन्त्रालयत सुनसान
येँ – मन्त्रिमण्डल हिलीगु खबर न्यना वनेवं सिंहदरबार दुनेया मन्त्रालयत सुनसान जूगु दु । प्रधानमन्त्री केपी शर्मा ओलीं मन्त्रिपरिषद् पुनर्गठन यायेगु तयारी यानाच्वंगुलिं मन्त्रालय सुनसान जूगु खः । प्रधानमन्त्री ओलीं चीकेगु धकाः नां किटान यानाच्वंगु मन्त्रालय थौंकन्हय् म्हो जक चहलपहल जुयाच्वंगु दु ।
प्रम ओलीं कार्यसम्पादनय् चित्त बुझे मजूपिं कृषि तथा पशुपंक्षी विकास मन्त्रालयय् चक्रपाणी खनाल, उद्योग वाणिज्य तथा आपूर्ति मन्त्रालय मातृका यादव, भौतिक तथा पूर्वाधार तथा यातायात मन्त्री रघुवीर महासेठ, संघीय मामिला तथा सामान्य प्रशासन मन्त्री लालबाबु पण्डित, महिला बालबालिका तथा ज्येष्ठ नागरिक मन्त्री थममाया थापा व गृहमन्त्री रामबहादुर थापाया मन्त्रालय दकलय् अप्वः सुनसान जुयाच्वंगु दु ।
LEAVE YOUR COMMENTS