चिहा संकिपा कासा ११३८ ‘हाःसः मदुगु सः’ न्हाप

मस्तय्त नेवाः भाय् स्यनां छुं ज्या मवः धाइम्ह छम्ह सरकारी अधिकारीया मांभाय् महत्व बारे मिखा चालावंगु बाखं न्ह्यब्वयातःगु सुनिता राजभण्डारी जुनुं निर्देशन याःगु ‘हाःसः मदुगु सः’ सर्ट फिल्मं चिहा संकिपा कासा ११३८ य् न्हापा सिरपाः त्याकूगु दु । सुनिताया लिसें प्रतीक डंगोलया न्ह्यब्वयाः थ्व सर्ट फिल्मं ७५ हजार दां सिरपाःया लिसें हनापौ त्याकूगु खः ।

अथेहे नेवाः भाय् मन्त धाःसा नेवाःतय् दैवीय शक्ति दुगु थीथी ग्रन्थत नं लोप जुया वनी धयागु थिमय् दयेकूगु दर्शन वीर शाक्यं निर्देशन याःगु फिल्म ‘द मिथ –०’ ५० हजार तका व दसिपौ सहितया लिउ सिरपाः त्याकल ।अमेरिकां नापलायेत वयेत्यंम्ह छय् लिसे खँ ल्हायेमाः धकाः अंग्रेजी भाय् सयेकाच्वंपिं बाज्या अजिपिं जब अमेरिकां वःम्ह छय्नं हे नेवाः भासं खँ ल्हाइ, अबलय् छक्क चाइ ।

थ्व हे बाखं ज्वनाः पोखरां चिहा संकिपा कासा ११३८ ब्वति काःवःगु ‘भकुंग्वारा’ व अमेरिकाय् वनाः छय्पाखें अनया नये त्वनेगु फुक्क संस्कृति सयेकल, तर छय्यात नेवाः भाय् छगू स्यनेमफुम्ह विवश अजिया बाखं न्ह्यब्वयातःगु ‘अस्तित्वं’ २५–२५ हजार तकाया लियां लिउ सिरपाः त्याकेत ताःलात ।

एभिसिडीया न्ह्यब्वया दुगु भकुंग्वारा ख्याःया निर्देशन यादवदास भ्वछिभोयं याःगु खःसा आर के फिल्म्सया न्ह्यब्वयाः अस्तित्वया निर्देशन रामकृष्ण खगीं याःगु खः । सिरपाः त्याकूपिंत बिहिवाः छगू समारोह दथुइ नेवाः न्ह्यलुवा व वरिष्ठ मानवअधिकारवादी नेता पद्मरत्न तुलाधरं दां सिरपाः व दसिपौ लःल्हाःगु खः । कासाय् झिगू सर्टफिल्म दुथ्याःगु खः ।

सुमन श्रेष्ठ, पवित्र कसाः, सुरेश मानन्धर व अमेरिकाया प्रवीण श्रेष्ठपिनि मंकाः ग्वसालय् न्हापांखुसी चिहा संकिपा कासा जूगु खः । चिहा संकिपाय् ब्वति काःगु मेमेगु फिल्मयात नं हःपाः कथं म्हतिं न्याद्वः न्याद्वः तका व दसिपौ लःल्हाःगु खः । थ्व फिल्म आः बाःछि लिपा च्यारिटि शो कथं क्यनीगु जूगु दु ।