पेट्रोलियम पदार्थया भाः कुहां वल

येँ – सरकारं म्हिगः चान्हय् १२ बजे निसें लागू जुइगु कथं पेट्रोलियम पदार्थया भाः समायोजना याःगु दु । नेपाल आयल निगमया म्हिगः च्वंगु बैठकं पेट्रोल, डिजेल व मचिकंया प्रतिलिटर नितका दरं भाः क्वकयाः समायोजना याःगु खँ निगमया प्रवक्ता वीरेन्द्र गोइतं जानकारी बियादीगु दु । न्हूगु भाः कथं पेट्रोल ११२, डिजेल व मचिकं ९९ प्रतिलिटर कायम जूगु दु ।

निगमं वंगु दँनिसें कार्यान्वयनय् हःगु ‘स्वचालित मूल्य संरचना’ कथं इण्डियल आयल कर्पोरेशन (आईओसीं) न्हूगु भाः निर्धारण यायेधुंकाः नेपालय् नं भाः समायोजन यानागु जानकारी नं प्रवक्ता गोइतं बियादिल ।उकथं हे निगमं निगमया डिपो–बिक्री केन्द्र निसें १५ किलोमिटर दुने लागू जइगु क्षेत्रदुने नं न्हूगु भाः क्वःछिउगु दु ।

उगु कथं झापा, विराटनगर, धनुषाया महेन्द्रनगर, वीरगञ्ज, अमलेखगञ्ज, भलवारी, नेपालगञ्ज व धनगढीइ पेट्रोलया भाः १०८.५० तका, डिजेल व मचिकं ९५.५० तका लिसें पोखरा व दाङया निंतिं पेट्रोलय् १०९.५० तका व मचिकं व डिजेलया निंतिं ९६.५० तका न्हूगु भाः क्वःछिउगु दु ।

निगमं चालू आर्थिक दँया छुं महिनाय् अन्तराष्ट्रिय बजारय् पेट्रोलियम पदार्थया भाः उच्चतम विन्दुइ थ्यनाः निगमयात अत्यधिक घाटा जूसां नं झिन्यान्हुया दुने धाःसा नाफा मिले यायेबलय् नं अझ नं ३ अर्ब २६ करोड घाटा जुयाच्वंगु जानकारी नं प्रवक्ता गोइतं बियादिल ।

सम्बन्धित बुखँ

LEAVE YOUR COMMENTS