ढल्केबार सवस्टेशन असारं क्वचाइगु

येँ – धनुषाया ढल्केबार सवस्टेशन दयेकाच्वंगु ठेकेदार कम्पनी टेलमोस इलेक्ट्रोनिक्सं असार दुने ज्या क्वचायेकेगु प्रतिवद्धता प्वंकूगु दु । म्हिगः आइतवाः ढल्केबार वंपिं प्राधिकरणया पुचः लिसे टेलमोसं असार दुने ज्या क्वचायेकेगु प्रतिवद्धता प्वंकूगु खः । थ्व स्वयां न्ह्यः ठेकेदारं सेन्ट्रल चाइना पावर ग्रिड इलय् ज्या क्वमचायेकूगु धासें प्राधिकरणं ठेक्का तोडे यानाः टेलमोसयात बिउगु खः ।

चिनियाँ पक्षं थ्यंमथ्यं ८० प्रतिशत ज्या क्वचायेकेधुंकूगु खः । टेलमोसया ज्या सन्तोषजनक जूगु खँ प्राधिकरणया अधिकारीपिंसं धाःगु दु । ठेकेदार कम्पनीयात निर्देशन बिसें विद्युत प्राधिकरणया निर्देशक कुलमान घिसिङं असार दुने ज्या क्वचायेकेत धाःगु दु । वय्कलं निर्देशन बिसें धयादिल, ‘असार दुने न्ह्याथें यानाः नं सबस्टेशन चार्य यायेमाः, इलय् ज्या क्वचाइगु कथं ज्या यानादिसँ ।’ टेलमोस व प्राधिकरणया दथुइ सम्झौता जूकथं सबस्टेशन दयेकेगु ज्या जुलाइ १८ दुने क्वचायेकेमाः ।