स्थानीय तहय् सहकारी संचालन अधिकार, केन्द्रं ज्या मयात, स्थानीय तह अलमलय्

येँ – संघीय संरचना कथं सहकारी संस्थात संचालनया सम्पूर्ण अधिकार स्थानीय तहपाखें जुइगु धाःसां अथे जुइमफुगुलिं देय्न्यंकं न्यनाच्वंगु द्वलंद्वः सहकारी संस्था प्रभावित जूगु दु । केन्द्रपाखें अधिकारी हस्तान्तरण यायेत व स्थानीय तहय् ज्याकू व्यवस्थापन यायेत म्होतिं नं निला बीतिनिगु खँ अधिकारीतय्सं धाःगु दु । केन्द्रपाखें ज्या दिकूगु तर स्थानीय तहय् ज्या सुरु मजूगुलिं न्हू दर्ता व आर्थिक ल्याःचाः बुझे यायेगु थेंज्याःगु ज्या प्रभावित जुइगु खँ सहकारीकर्मीतय्सं धाःगु दु ।

संघीय व्यवस्थां सहकारी सम्बन्धी फुक्क अधिकार स्थानीय तहयात बिउगुलिं थौंकन्हय् संचालनय् वयाच्वंगु ३८ गू डिभिजन सहकारी ज्याकू ज्या मयासे च्वनाच्वंगु दु । तर स्थानीय निकायं धाःसा ज्या हे सुरु याःगु मदुनि । मुख्य यानाः ज्याकू चायेकेगु, कर्मचारी व्यवस्थापन व न्हूगु कानून तकं दयेकेमानिगु जूगुलिं छुं अलमल जुयाच्वंगु खँ स्थानीय अधिकारीतय्सं धाःगु दु । सिन्धुपाल्चोक भिमेश्वर नगरपालिकाया प्रमुख भरत केसीं धयादी, ‘दुगु अधिकारयात नं थ्व मदुनि व मदुनि धकाः मयायेगु स्वयां नं झीसं गथे यानाः जिउ अथे यानाः कर्मचारी व्यवस्थापन यानाः ज्या यायेगु जुइ ।’

देय्न्यंकं ३४ हजारं मल्याक बचत तथा ऋण सहकारी संस्था दु । व दँय्दसं झिंन्यासःगू थज्याःगु सहकारी दर्ता जू वयाच्वंगु सहकारी विभागया तथ्यांक दु । आः थुपिं फुक्क सहकारीयात तहगत कथं छुटे यायेगु प्रक्रियां ताःई काइगु खँ धाःगु दु । सहकारी विभागया उपरजिस्ट्रार नारायणप्रसाद ज्ञवालीं धयादी, ‘स्थानीय तहया अधिकार क्षेत्र दुने लाःगुलिं ज्या थन जुयाच्वंगु मदुनि । जिमिसं छुं ज्या बुझे यायेमानि, अथे जूगुलिं नं स्थानीय सरकारं ज्या न्ह्याके मफयाच्वंगु दु ।’

सम्भावित अन्योल चिइकेत नमूना कानुन दयेकाः देय्न्यंकं प्रशिक्षण बीगु तयारी सहकारी तथा गरिबी निवारण मन्त्रालयया दु । मन्त्रालयया सचिव गोपीनाथ मैनालीं धयादीगु दु, ‘संविधान प्रतिकूल मजुइकथं प्रत्येक प्रदेश व स्थानीय तहं सहकारी सम्बन्धी कानुन दयेकेफइ । थुकिया निंतिं आः झीसं नमूना कानुन दयेकाः क्षमता अभिवृद्धि ज्या न्ह्याकेगु जुइ । देय्न्यंकं कानूनय् एकरुपता आवश्यक दु ।’अधिकार हस्तान्तरण प्रक्रियां ई काल धाmसा थुकिं देय्न्यंकंया सहकारी संस्थाया आर्थिक हिसाब बुझे यायेगु प्रक्रियाय् लिच्वः लाइगु खँ धाःगु दु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन