‘जिगु राजीनामा फ्वनीगु स्वाभाविक खः’

येँ (नेपालभाषा टाइम्स)- १०० किलो लुँ काण्डं यानाः आलोचना व तारिफ नितां फयाच्वंम्ह उपप्रधान लिसें गृहमन्त्री नारायणकाजी श्रेष्ठं भ्रष्टाचार विरोधी अभियान पनेगु कुतः असफल यायेगु खँ धयादीगु दु । म्हिगः गोरखाय् पत्रकारतलिसे खँ ल्हासें उपप्रम श्रेष्ठं भ्रष्टाचार विरुद्ध अभियान न्ह्याकागु कारणं हे थःगु राजीनामा फ्वनाच्वंगु खँ कनादीगु दु ।

भ्रष्टाचारीत थःगु हे पार्टी दुने नं दयेफु, सत्ता गठबन्धन दुने नं दयेफु उकिं भ्रष्टाचार विरुद्धया अभियान पनेत कुतः जुइगु स्वभाविक खः धकाः नं वय्कलं कनादिल ।

त्रिभुवन विमानस्थलंं लुँ पिहां वंगु प्रकरणय् सत्ता गठबन्धनया हे छुं नेतातय्सं गृहमन्त्री श्रेष्ठया राजीनामा फ्वनाच्वंगु बारे वय्कलं धयादिल, ‘थ्वयात जिं अस्वाभाविक रुपं मकया ।’

गृहमन्त्री श्रेष्ठं धयादिल, ‘थ्व समाजय् उलिमछि तःधंगु समस्या दु अथे जुयाः जिमिसं जबर्जस्त भ्रष्टाचार विरोधी व अनियमितता विरोधी अभियान न्ह्याकाच्वनागु दु, थ्व भ्रष्टाचार

विरोधी अभियानयात पनेत थीथी कुतः जुइगु स्वाभाविक खः, तर अज्याःगु कुतःयात जिमिसं असफल यायेगु जुइ, समृद्धिया आज्जुइ थ्यंकेत थ्व सरकार प्रतिबद्ध दु ।’

वय्कलं त्रिभुवन अन्तर्राष्ट्रिय विमानस्थलया भन्सारं पिहां वंगु लुँ प्रकरणया अनुसन्धान मदीगु खँ नं कनादिल । अनुसन्धानया झ्वलय् तथ्य प्रमाणया आधारय् न्ह्याम्ह दुथ्याःसां कारबाहीया दायरय् हयेगु खँ नं वय्कलं धयादीगु दु ।

उकथं हे गृहमन्त्री श्रेष्ठं विमानस्थलया फुक्कं निकायया न्हू ढंगं व्यवस्थापन यायेगु सोच दयेकाच्वनागु खँ कनादिसें धयादिल, ‘न्हापांगु पलाः कथं आगमन कक्षय् लगेजया स्क्रिनिङय् जुइमा वा कार्गोया स्क्रिनिङय् जुइमा गनं नं प्रहरी उपस्थित मजुइगु आःया व्यवस्थायात हीकाः अन प्रहरी उपस्थित याकेगु व मेपिनिगु हकय् प्रविधि सहित न्हूगु ढंगं व्यवस्थापन यायेगु सोच दयेकाच्वनागु दु ।’