दिप संरक्षणय् नेवाः ऐक्यवद्धता

येँ- चाबहिली परम्परांनिसें छ्यला वयाच्वंगु दिपय् स्थानीय नेवाःतय्त सी उइके बी मखु धकाः अन च्वं वःपिं आप्रवासीतय्सं थंगु पंगःया विरोधय् म्हीग स्वनिगःया थीथी लागाय् च्वंपिं नेवाःतय्सं अन वनाः ऐक्यवद्धता प्वंकेगु ज्या जुल । परम्परागत दिपय् पंगः थने दइ मखु धकाः च्वयातःगु ब्यानर व पम्प्लेट ब्वया वःपिं सलंसः नेवाःतय्सं चाबहिली च्वंगु चारुमति विहारय् च्वनाः चीधंगु कोणसभा नं याःगु खः । ऐक्यवद्धताय् वःपिं ख्वप, किपू, पांगा आदि लागाया सहभागीतय्सं थः गनं गनं वयागु खः अन अनयागु हे थाय्या नां समेत च्वयाः छातीइ तिका वःगु खः ।

स्थानीयवासीतय्सं धाः कथं उगु थासय् थ्व दिप छ्यला वयाच्वंगु थनिं २३०० दँ दयेधुंकूगु दु । दिपया जःखः जग्गा न्यानाः च्वं वःपिं स्वनिगः पिनेयापिं मनूतय्सं आः थःपिंत मछिन धासें सी उगु दिकेगु कुतः याःगु खः । वंगु आइतवाः मदुम्ह स्थानीय भीममाया डंगोलया सीम्ह उइत अन हः बलय् अन च्वनाच्वंपिं मनूतय्सं पंगः थंगु खः । स्थानीय पीडिततय्सं धाः कथं सी उइगु पनेगु लागिं अन च्वंम्ह मिलन जोशी नांयाम्ह मनुखं मनू मुंकाः ख्यायेत स्वःगु खः । मिलन जोशीं निदँ न्ह्यः तिनि दिपया नापसं च्वंगु जग्गा दंक न्यानाः छेँ दंगु खः । अन सी उइगु दिप दु धइगु सीक सीकं छेँ दंगुलिं वं नियतवश हे दिपयात अनं विस्थापित यायेत स्वःगु द्वपं पीडिततय्सं बिउगु दु । पिनें वःपिं मनूतय्सं अन छेँ दना हःगुलिं स्थानीय जनताया सी लँ तकं त्यला हःगु खँ नं धाःगु दु ।

आइतवाः अन कचवं जुइवं छवाः तक निगुलिं पक्षं छुं मयायेगु व छवाः लिपा येँ मनपाया मेयर सहित वार्ता यानाः छगू निष्कर्ष पिकायेगु सहमति जूगु खः । स्थानीय पीडिततय्सं दिपया जःखः दना तःगु छेँ अधिकरण यानाः परम्परागत दिपया संरक्षण यायेमाःगु माग याःगु दु । थुकिया लागिं मनपा व सरकारपाखें ग्वाहालि यायेमाःगु नं उमिगु आग्रह दु ।

सम्बन्धित बुखँ

LEAVE YOUR COMMENTS