ओमबहाःया मोतिरत्न न्हूम्ह देय्थाय्पा

येँ – येँया ओमबहाः त्वाःया हनेबहम्ह चक्रेश्वर मोतिरत्न वज्राचार्य देय्थाय्पा जुया बिज्याःगु दु । येँ देय्या झिंच्यागू बहाःया दकलय् ज्याथम्ह वय्कःयात येँ देय्या देय्थाय्पाया धर्मासनय् आसन ग्रहण याकाबिज्याःगु खः ।

वंगु कछलागा दुतिया, बुधवाःकुन्हु वसपोलयात राजगुरुजु मञ्जुश्रीरत्न वज्राचार्यं देय्थाय्पाया मुखः पुइकाः धर्मासन आरोहण याकाबिज्याःगु खः । मूलचक्रेश्वरया अभिषेक ज्याझ्वलय् राजगुरुजु वज्राचार्यं छसिकथं कलशाभिषेक, मुकटाभिषेक, वज्राभिषेक, घण्ठाभिषेक, नामाभिषेक, पुष्पाभिषेक, फलाभिषेक प्रदान यानाबिज्याःगु खः ।

बौद्ध विद्वान प्रा. डा. नरेशमान वज्राचार्यं अभिषेक गाथा वाचन यानाबिज्यासें देय्थाय्पा लुइगु ज्याझ्वः छुं छगू जाति विशेषया जक मखसे देय्या हे गर्वया खँ जूगुलिं थुकी राज्यपाखें नं ग्वाहालि यायेमाःगु विचाः प्वंकाबिज्यात ।

येँ महानगरपालिकाया प्रमुख विद्यासुन्दर शाक्यं मूपाहांया थासं येँ मनपां न्ह्याबलें नं झीगु मौलिक, मूर्त व अमूर्त कला संस्कृतिया संरक्षण संवद्र्धन यायेगु ज्याय् तयार जुयाच्वनागु दु धासें थुकिया निंतिं झी सकलें जागरुक जुइमाःगु खँ कनादिल ।

राजगुरुजु वज्राचार्यं सुभाय् देछासे नेपालमण्डलय् परापूर्वकालनिसें मदिक्क न्ह्याना वयाच्वंगु नेपाःया मौलिक बुद्ध धर्म ‘वज्रयान बौद्ध धर्म’यात म्वाका तयेमाःगुलिसें थौंकन्हय् थुकी खने दयाच्वंगु विकृति विसंगतियात चिइका छ्वयेत ईकथं सरलता, मितव्ययीता, विकृति विसंगतिं मुक्त व विज्ञान सम्मत सुधार यानाः न्ह्याः वनेमाःगु खँय् बः बियादिल ।

देय्थाय्पा लुइगु ज्याझ्वः येँया ओमबहाः त्वालय् हे जूगु खःसा उगु इलय् थीथी बहाः बहीया चक्रेश्वर आजु, मू थाय्पा, आजुनापं भिक्षु व लामागुरुपाखें भिंतुना देछायेगु ज्या जूगु खः ।