स्वक्वःगु मातृभाषा पत्रकारिता दिवस हन

यल – नेपालभाषाया पत्रकारिता सुरु जूगु ९३ दँ क्यंगु लसताय् आइतवाः स्वक्वःगु मातृभाषा पत्रकारिता दिवस हन ।नेवाः पत्रकार राष्ट्रिय दबू केन्द्रीय समितिं यल शाखाया व्यवस्थापनय् थीथी ज्याझ्वः यानाः दिवस हंगु खः । नेपाल संवत १०४५ (विक्रम संवत १९८२) बुद्ध जयन्तीया दिंकुन्हु भारतया कलकत्तापाखें धर्मादित्य धर्माचार्य (जगतमान वैद्यं) ‘बुद्ध धर्म व नेपालभाषा’ नांगु पत्रिका पिथनेवं नेपालभाषा पत्रकारिता सुरुवात जूगु खः ।

वय्कःया ११३ क्वःगु बुदिं लाकाः मातृभाषा पत्रकारिता दिवस कथं स्वदँ न्ह्यःनिसें हनेगु ज्या जूगु खः । थ्वहे पत्रकारिता सम्भवत गैर नेपालभाषां पिदंगु न्हापांगु पत्रिका जूगु आः तकं अध्ययनं प्रमाणित जूगुलिं मातृभाषा पत्रकारिता दिवस नेवाः पत्रकार राष्ट्रिय दबूया केन्द्रीय अध्यक्ष श्रीकृष्ण महर्जनं कनादिल । उगु हे ज्याझ्वलय् यलया पुल्चोकय् धर्मादित्य धर्माचार्य (जगतमान वैद्य)या झ्वाताय् नं स्वांमाः क्वखायेकूगु खः ।

ज्याझ्वलय् वक्तातय्सं संविधानं देसय् न्ववाइगु फुक्कं भाषायात मातृभाषा खः धकाः धाये धुंकूगु अवस्थाय् नं मातृभाषा पत्रकारिताया विकासया लागिं राज्यं विशेष ध्यान तयेमाःगु खँ कनादिल । प्रत्येक नेपालीयात मातृभाषाया माध्यमं सूचना फ्वनेगु व सुसुचित जुइगु हक दुगु कनादिसें सहभागी वक्तातय्सं उकिया प्रत्याभूति यायेत राज्य तयार जुइमाः धयादिल ।
ज्याझ्वलय् वांगमय शताब्दी–पुरुष सत्यमोहन जोशीं नेपाःया पत्रकारिता दायरा तब्याः यायेत मातृभाषाया पत्रकारिताया प्रवद्र्धन यायेमाःगु खँ कनादिल ।

वय्कलं धर्मादित्य धर्माचार्य बुद्धधर्म व नेपालभाषा प्रति अनुरागं यानादीगु पत्रकारिता आः व्यावसायिक धारय् न्ह्यःने वनाच्वंगु न्ह्यथनादिसें उकियात राज्यया साथ व ग्वाहालि दयेमाःगु खँ कनादिल । नेपाल आदिवासी जनजाति पत्रकार महासंघया केन्द्रीय अध्यक्ष दण्ड गुरुगं न्हापांम्ह पत्रकार कथं धर्मादित्य धर्मायार्चयात मान्यता बियाः मातृभाषा पत्रकारिता दिवस हनेमाःगु कनादिल । मुलुक संघीयताय् वने धुंकूगु सन्दर्भय् विविध भाषाया पत्रकारिताया विकासया लागिं प्रदेश व स्थानीय तहया विशेष पहल जुइमाःगु नं अध्यक्ष गुरुगं कनादिल ।

उगु ज्याझ्वलय् यल प्रदेश नम्बर २ या प्रदेश सांसद ज्ञानेन्द्र शाक्यं ३ नम्बरया नां ऐतिहासिक तथ्य व प्रमाणया लिधंसाय् नेपालमण्डल तयेत सञ्चारकःमिपिंत थःगु थासं भूमिका म्हितेत बः बियादिल । वय्कलं संविधानं बियातःगु प्रेस स्वतन्त्रताया हकयात उच्चतम अभ्यासया लागिं मातृभाषा पत्रकारिताया विकास जुइमाःगु खँ तयादिल । दबूया ग्वसाय् थ्वहे वइगु जेठ ३ गते मातृभाषा पत्रकारिता विकासया बृहत अन्तरक्रिया ज्याझ्वः जुइगु उगु ज्याझ्वलय् जानकारी बिउगु दु ।