आरआरय् भाषा निभाः कसाःया बुन्हि

येँ(नेपालभाषा टाइम्स)÷रत्न राज्यलक्ष्मी (आरआर) क्याम्पसय् भाषा निभाः पे्रमबहादुर कसाःया १०६ क्वःगु बुन्हि हंगु दु । सुकुन्दा साहित्य पाःलाः व क्याम्पसया नेपाली व नेपालभाषा विभागया मंकाः ग्वसालय् साहित्यिक व सांगीतक ज्याझ्वः यासे भाषा निभाः कसाःया बुन्हि हंगु खः ।

मूपाहांकथं झायादीम्ह क्याम्पस प्रमुख प्रा. डा. जीवनधर ज्ञवालीं भाषा निभाः कसाःया किपाय् स्वां देछासे त्वाःदेवाय् मत च्याकाः उलेज्या यानादीगु ज्याझ्वः पाःलाःया दुजः सुमितदास रंजितकारं अमरकथा चिनाखं वाचन यासें न्ह्याःगु खः ।

ज्याझ्वलय् नवासें मूपाहां क्याम्पस प्रमुख प्रा. डा. ज्ञवालीं भाषा साहित्य ख्यःया महान् व्यक्तित्वपिंत लुमंकाः थुकथंया ज्याझ्वः याःगुलिसें लसता प्वंकादिसें नेपालभाषा संवद्र्धन व प्रवद्र्धनया निंतिं थः न्ह्याबलें तयार दु धयादिल ।

नेवाः देय् दबूया नायः पवित्र वज्राचार्यं पाःलाःपाखें नेपालभाषा ख्यःया थुकथंया व्यक्तित्वपिंत लुमंकाः याःगु ज्याझ्वःयात कयाः च्वछायादिसें भाषा निभाः कसाःया प्रेरणा कयाः थौंया ल्याय्म्ह पुस्ता न्ह्याः वनेमाःगु खँय् बः बियादिल । लिसें वय्कलं वइगु दिनय् पाःलाः नाप सहकार्य यानाः वनेत थःपिं तयार दु धयादिल ।

क्याम्पसया पुलांम्ह विद्यार्थीलिसें नेपालभाषा केन्द्रीय विभागया शिक्षण सहायक शरद कसालं भाषा निभाः कसालं नीस्वनाथकूगु आशा सफू कुथि थौं स्वदेशी जक मखु विदेशीतय् निंतिं नं नेवाःया बारे अध्ययन अनुसन्धान यायेगु छगू प्रमुख केन्द्र जुयाच्वंगु खँ न्ह्यथनादिल । लिसें वय्कलं भाषा निभाः पे्रमबहादुर कसाः थौं झीगु न्ह्यःने मदुसां वय्कलं पलिस्था यानादीगु आशा सफू कुथि ल्यनाच्वंतले झी दथुइ भाषा निभाः कसाः नं न्ह्याबलें अमर जुयाच्वनी धयादिल ।

क्याम्पसया नेपालभाषा शिक्षक सह प्रा. मदनसेन वज्राचार्यं भाषिक समानताया निंतिं २०१९ सालय् केदारमान व्यथित सत्यमोहन जोशीपिं नापं जानाः जुजु महेन्द्रयात विन्ति पत्र लःल्हाःगु खँ कनादिसें भाषा, साहित्य व अनुसन्धानय् प्राचीन ग्रन्थ संरक्षण व संवद्र्धन यायेगु ज्याय् वय्कलं ज्वःमदुगु योगदान बियादीगु खँ कनादिल ।

पाःलाःया नायः प्रशान्त डंगोलं लसकुस यासें पे्रमबहादुर कसाःथें झीगु भाषा ख्यःया मेमेपिं विद्वान साहित्यह्यमिपिनिगु बुदिं हनाः वय्कःपिनिगु बारे न्हू पुस्तायात म्हसीका बीमाःगु आवश्यकताकथं थुकथंया ज्याझ्वः यानागु खँ कनादिल । लिसें वय्कलं अज्याःपिं व्यक्तित्वपिनिगु अप्रकाशित कृति प्रकाशनय् हयेत नं थुकथंया ज्याझ्वः यानागु खँ धयादिल ।

प्रा. डा. चन्द्रमान वज्राचार्यं भाषा निभाः कसाःया जीवनी बारे चर्चा यानादीगु ज्याझ्वलय् जनगायक चन्द्रबहादुर श्रेष्ठ (माइला दाइ) नं महाकवि गिरिजाप्रसाद जोशीया ‘चिलाख च्याकाः’ म्येँ व लोककवि राजभाई जकःमिं भाषा निभाः कसाःया जीवनीयात कयाः च्वयादीगु चिनाखँ न्यंकादीगु खः ।

क्याम्पसया नेपाली व नेपालभाषा केन्द्रिय विभागया डा. विष्णु ज्ञवालीया सभापतित्वय् पाःलाःया छ्याञ्जे रिदेन महर्जनया संयोजनय् जूगु ज्याझ्वलय् सहायक क्याम्पस प्रमुख प्रमिला विडारी, नेपाःया न्हापांम्ह ट्राफिक इन्जिनियर शान्तवीर सिंह तुलाधर, ईलोहं प्रकाशनया प्रबन्ध निर्देशक नरेशवीर शाक्य लगायत आपालं भाषा ह्यमिपिनिगु उपस्थिति दुगु खः । ज्याझ्वलय् साहित्य वाचनलिसें सांगीतिक ज्याझ्वः नं न्ह्यब्वःगु खः ।