आः अनसन च्वनेगु ग्यानापु

येँ – कञ्चनपुरय् बलात्कार लिपा हत्या जूम्ह निर्मला पन्तया हत्यारा माला बी माःगु माग यासें डा. गोविन्द केसीं हानं अनसन च्वनेगु ख्याच्वः बियादीवं वय्कःया स्वास्थ्यया बारे नं चिउताः सुरु जूगु दु । थुपालय् वय्कःयात अनसन मच्वनेगु लागिं चिकित्सकतय्सं सुझाव बिउगु खँ सीदुगु दु ।

डा. केसी थौंकन्हय् नुगःचुया समेत ल्वगि जुयादीगु कारणं वय्कः हानं छुं मनसे अनसन च्वनादिल धाःसा वय्कःया स्वास्थ्यय् बांमलाःगु लिच्वः लाये फइगु खँ चिकित्सकतय्सं धाःगु दु । थनिं बाःछि न्ह्यः वय्कः टिचिङ अस्पतालया मनमोहन कक्षय् भर्ना जुयादीगु खः । अन वय्कःयात प्रधानमन्त्री केपी ओली हे भर्ना याःगु क्याबिनय् तयाः वासः याःगु खः ।

वय्कःया अबले प्रम ओलीयात हे वासः यानादीमह नुगःचु ल्वय्या विशेषज्ञ डा. अरुण साय्मिं वासः यानादीगु खः । डा. केसीयाके न्हापा हे थीथी कथंया ल्वय् दुगु खःसां आः उकी नुगःचुया ल्वय् समेत थपे जूगुलिं वय्कःया लागिं आः अनसन च्वनेगु तसकं ग्यानापुइगु खँ चिकित्सकतय्सं धाःगु दु ।

अन उपचार यानाःलि डा. केसीं नुगःचुया वासः नं नियमित नयेगु सुरु यानादीगु खः । नुगःचुया वासः नये माःपिं विरामीतय्सं नसात्वँसाय् तसकं ध्यान बीमाःगु खँ चिकित्सकतय्सं धाःगु दु ।

तर डा. केसीं धाःसा थःगु स्वास्थ्यया चिउताः मतसें निर्मला पन्तया छेँजःयात न्याय बीगु आन्दोलनय् थः सक्रिय जुइगु घोषणा यानादीधुंकूगु दु । निर्मलाया हत्यारा माला बी माल धइगु माग यासें कञ्चनपुरय् निर्मलाया छेँजःपिं नं अनसन च्वनाच्वंगु दुसा वय्कःया बौ येँय् अस्पताल भर्ना यानातःगु दु ।