एमसीसी विवाद – लिबाःसा नेपाःपाखें क्षतिपूर्ति
येँ – विवादय् लानाच्वंगु एमसीसी सम्झौता यायेगु ज्या लिबात धाःसा थ्व लिबाःगुया क्षतिपूर्ति नेपालं पुले मालीगु खँ धाःगु दु । यदि इलय् सम्झौतायात संसदं पारित यानाः कार्यान्वयन यात धाःसा उकिया सम्पूर्ण खर्च एमसीसीपाखें हे व्यहोरे याइ । छुं जुयाः इलय् कार्यान्वयन याये मफुत धाःसा एमसीसीपाखें नेपालय् ज्याकू चायेकाः आः तक गुलि नं ज्या यायेधुंकूगु खः, व खर्च फुक्क नेपालं व्यहोरे याये मालीगु खँ धाःगु दु ।
थ्व सम्झौता पारित जुल धाःसा अमेरिकां उर्जा व यातायात क्षेत्रया विकास यायेत ६० अर्ब तकाया अनुदान बी । तर सम्झौतायात संसदं पारित यायेगु ज्याय् सत्तारुढ दल नेकपाय् विवाद पिहां वःगुलिं ढिलाई जुयाच्वंगु दु ।
थ्वहे झ्वलय् एमसीसी सम्झौता बारे नेकपाया नेतातय्त खँ थुइकेगु लागिं नेपाःस्थित अमेरिकी दूतावास व स्वयम् एमसीसीया उपाध्यक्ष हे नेपाः वयाः लबिङ तीव्र यायेवं पार्टी दुने थुकिया समर्थनय् बिचाः तइपिं अप्वया वःगु खँ सूत्रं धाःगु दु । छुं ई न्ह्यः तक वरिष्ठ नेता माधव नेपालं थुकिया कडा विरोध यानाच्वंगु खःसा एमसीसी उपाध्यक्षं छक्वः नापलायेवं वय्कलं आः ‘थ्व याये हे मजिउगु सम्झौता चाहिँ मखु’ धायेगु याना हःगु खँ सूत्रं धाःगु दु ।
मेखे पार्टीया अध्यक्ष पुष्पकमल दाहालं थुकिया विरोध यानाच्वंगुया कारण धाःसा सम्झौता हे गलत जुयाः मखुसें अमेरिकां माओवादीयात न्हापा यानातःगु अपमानपूर्ण व्यवहारया ब्वला सायेत जक खः धकाः अनुमान यानाहःगु दु । यदि अमेरिकां थुकिया पक्षय् छुं सम्बोधन यात धाःसा दाहाल नं सहमत जुइगु सूत्रया दावी दु ।
कार्यदल दुने नं विवाद
एमसीसी सम्झौता बारे अध्ययन यानाः पार्टीयात सुझाव बीगु लागिं नेकपां गठन याःगु कार्यदलया म्याद म्हिगः क्वचाःगु दुसा कार्यदलं अझ मेगु झिन्हुया म्याद फ्वंगु खँ सीदुगु दु । कार्यदलया ज्या अझं न्ह्यानाच्वंगु व प्रतिवेदन हे च्वयेगु ज्या ल्यं दनिगु जुयाः मेगु ई फ्वंगु खः । सूत्रया कथं कार्यदलया संयोजक झलनाथ खनाल लचक खने दुसां उकिया मेपिं निम्ह दुजःत भिम रावल सम्झौताया कट्टर विरोधी व परराष्ट्र मन्त्री प्रदिप ज्ञवाली कट्टर समर्थक जूगु कारणं यानाः कार्यदलं ज्या हे याये फयाच्वंगु मदुनि । संयोजक खनालं पार्टीया निम्ह अध्यक्षतय्सं एमसीसी बारे निता अलग अलग हे खँ न्ववानाच्वंगुलिं नं ज्या यायेत थाकुयाच्वंगु खँ कनादीगु दु ।
LEAVE YOUR COMMENTS