मैत्रेय युवा संघया नीन्यादँ बुन्हि हन

ख्वप (नेपालभाषा टाइम्स)- मैत्रेय युवा संघया नीन्यादँ बुदिं हंगु दु । शनिवाः पञ्चशिल ग्रहण यासें शुरु जूगु ज्याझ्वलय् संचित बुद्धाचार्यं लसकुस यासें रजतजयन्ति ज्याझ्वःया ल्याःचाः नं न्ह्यब्वयादीगु खः । अथेहे प्रेमसा शिल्पकार, सुमिना जोन्छे व सिजन शाक्यपिंसं परियत्ति ब्वनागुया थःथःगु अनुभव प्वंकादिल ।

संघया अध्यक्ष लक्ष्मीचन्द्र बज्राचार्यया सभापतित्वय् जूगु ज्याझ्वलय् निवर्तमान अध्यक्ष सत्यलक्ष्मी रंजितं आनापाना ध्यानया महत्व विषयय् नुगखँ प्वंकादिलसा अर्जुन प्रजापतिं परियत्ति शिक्षाया महत्व कनादिल । अथेहे भक्तपुर बौद्ध सम्पदा संघया निवर्तमान अध्यक्ष पद्मसुन्दर शाक्यं संघपाखें न्ह्याकाच्वंगु ज्याझ्वःयात च्वछायादिल ।

थथुबहिली जूगु थुगु ज्याझ्वःया अन्तय् रजतजयन्ति समारोहया संयोजक व संघया उपाध्यक्ष तिर्थराज बज्राचार्यं ज्याझ्वलय् ग्वाहालि बियादीपिं दातापिं, टिशर्त प्रायोजन यानादीपिं महामन्जुश्री गुरु गुथि परिवार व स्मारिका प्रकाशनय् विज्ञापन व च्वसु बियाः ग्वहालि यानादीपिं सकसितं सुभाय् देछायादीगु खः ।