नगरया दकलय् पुलांगु क्याम्पस स्थानीय निकाययात लःल्हात
येँ- येँ देशं उत्तरपूर्वी भेगय् लाःगु ऐतिहासिक, धार्मिक व सांस्कृतिक नगरी सक्वया दकलय् पुलांगु क्याम्पस स्थानीय निकाययात लःल्हाःगु दु । सक्व देय्या हे दकलय् पुलांगु भाग्योदय क्याम्पस शंखरापुर (सक्व) नगरपालिकायात लःल्हाःगु खः ।
वंगु असार २ गते नगरपालिकाया हे भवनय् जूगु छगू ज्याझ्वःया दथुइ सक्व देय्या दकलय् पुलांगु उगु क्याम्पस नगरपालिकायात लःल्हाःगु खः । क्याम्पस संचालक समिति व नगरपालिकाया दथुइ नगरपालिकायात क्याम्पस लःल्हाये व लःल्हाना कायेगु सम्बन्धय् छगू सम्झौता जूगु खः । क्याम्पस लःल्हाये स्वयां न्ह्यः जूगु सम्झौताकथं भाग्योदय क्याम्पस व्यवस्थापन समितिया अध्यक्ष राजेन्द्र मल्ल व शंखरापुर नगरपालिकाया प्रमुख सुवर्ण शाक्यं सम्झौता पती ल्हाःचिं तयादीगु खः ।
वि.सं. २०५९ सालय् सक्वया हे शिक्षाप्रेमीलिसें समाजसेवी जोगमेहर श्रेष्ठया सक्रियताय् सक्व देय् दुने हे सर्वसुलभ उच्च शिक्षा बीगु ल्याखं उगु क्याम्पस स्थापना याःगु खः । थनिं स्वदँ न्ह्यः हे नगरप्रमुख श्रेष्ठं नमूना क्याम्पसया रुपय् विकास यायेगु धयादीगु खः । उगु इलय् वय्कलं थुकिया निंतिं नगरपालिका व क्याम्पस व्यवस्थापन समितिं मंकाःकथं क्याम्पसया व्यवस्थापन यायेगु खः वा नगरपालिकां हे छुं ईया निंतिं अनुदान बियाः व्यवस्थापन समितियात ग्वाहालि यायेगु खः धइगु खँय् व्यवस्थापन समितिपाखें स्पष्ट खँ हयेत इनाप यानादीगु खः ।
ख्वप नगरपालिकां थःपिनिगु हे स्वामित्वय् ख्वप कलेज संचालन याःथें उगु सक्व नगरपालिकां नं उगु क्याम्पस संचालन याये फइगु विचाः नं उगु इलय् वय्कलं तयादीगु खः । क्याम्पस संचालनया निंतिं नगरपालिकां न्हापा २ गू लख व लिपा न्यागू लख अनुदान नं बिया वयाच्वंगु खः ।
२०७७ मंसिर १९ गतेया विशेष सभां क्याम्पस संचालन व व्यवस्थापन नगरपालिकायात बीगु निर्णय पारित याःगु खःसां कोभिड महामारीया प्रकोप न्यना वंगुलिं लःल्हायेगु ज्या नं लिज्याः वंगु खः । नगरपालिकायात क्याम्पस लःल्हायेधुंकाः आः क्याम्पस संचालनसम्बन्धी कार्यविधि २०७८ कथं क्याम्पस संचालन जुइ । क्याम्पस लःल्हायेगु सम्बन्धी सम्झौता पती ल्हाःचिं तयेगु ज्याभ्mवलय् संचालक समितिया कार्यवाहक अध्यक्ष दुर्गाप्रसाद मल्ल, उपाध्यक्ष गोविन्दप्रसाद श्रेष्ठ, नगरउपप्रमुख शुक्रलक्ष्मी श्रेष्ठ, निमित्त क्याम्पस प्रमुख विरेन्द्रप्रसाद श्रेष्ठ वडाअध्यक्ष, सक्व नगरपालिकाया कर्मचारी व प्रतिनिधितय् उपस्थिति दुगु खः ।
LEAVE YOUR COMMENTS