इन्टर मिलान व म्यान्चेस्टर सिटी च्याम्पियन्स लिगया सेमिफाइनलय्

एजेन्सी- इटलीयन क्लब इन्टर मिलान झिंस्वदँ लिपा च्याम्पियन्स लिगया सेमिफाइनलय् थ्यंगु दु । इन्टरं आः झिंखुदँ लिपा सेमिफाइनलय् थ्यंगु थःगु हे देय्या एसी मिलानलिसे धेंधेंबल्लाः याइगु जुइ । एसी मिलान म्हीग जूगु कासाय् नापोलीयात बुकाः झिंखुदँ लिपा सेमिफाइनलय् दुहांवंगु खः ।

मेखे म्हिगः चान्हय् हे जूगु मेगु कासा इंग्लिस क्लब म्यानचेस्टर सिटी नं जर्मन क्लब बार्यन म्यूनिखलिसे १–१ गोलया बराबरी म्हितुसें सेमिफाइनलय् दुहां वंगु दु । सिटी न्हापांगु लेगया कासाय् ३–० गोलं त्याःगुलिं समग्रय् ४–१ गोलं कासा त्याकुसें सेमिफाइनलय् थाय् दयेकूगु खः । म्युनिखय् जूगु कासाय् एर्लिङ हालान्डं गोल यासें सिटीयात अग्रता बिउगु खःसां खःसा बायर्नया निंतिं योसुवा किम्मखं बराबरी गोल यानाबिउगु खः । सिटीं आः सेमिफाइनलय् स्पेनीस क्लब रियल म्याड्रिडलिसे म्हितीगु जुइ ।

इन्टरं म्हिगः चान्हय् जूगु क्वार्टरफाइनलया निगूगु लेगया कासाय् पोर्चुगिज क्लब बेन्फिकालिसे ३–३ गोलया बराबरीइ म्हितुसें सेमिफाइनलय् थाय् दयेकूगु खः । न्हापांगु लेगय् २–० त्याःगु इन्टर समग्रय ५–३ गोलं विजय चूलाकाः न्ह्याःवंगु खः । सन् २००९–१०या सिजनय् इन्टरं बायर्न म्युनिखयात बुकाः च्याम्पियन जूगु खः । थनं लिपा इन्टरं छक्व नं सेमिफाइनलय् थ्यंगु मदुनि । म्हिगः जूगु कासाय् इन्टरया निंतिं निकोला बरेल्ला, लोउटारा मार्टिनेज व जोआक्विन कोरेआलें गोल याःगु खः ।

बरेल्लां कासाया १४ औं मिनेटय् हे इन्टरया निंतिं गोल याःगु खःसां ३८ औं मिनेटय् बेन्फिकाया फ्रेडरिक अर्सनेसंं गोल यासें कासा बराबरीइ हयाबिल । निगूगु हाफय् ६५ औं मिनेटय् लोउटारो मार्टिनेजं छगू व ७८ औं मिनेटय् जोआक्विन कोरेआलें छगू गोल यासें इन्टरयात ३–१ गोलं अग्रता बिउगु खःसां ८६ औं मिनेटय् एन्टिोनिया सिल्भां व इन्जुरी ईया न्यागूगु मिनेटय् मुसां बेन्फिकाया निंतिं गोल यानाबिइव कासा बराबरीइ क्वचाःगु खः ।

सेमिफाइनल कासा वइगु मे ९ व १६ कुन्हु जुइ ।