कोरोना खोप : दकलय् न्हापां सुनां कायेखनी ?
येँ (नेपालभाषा टाइम्स) – नकतिनि हे जक कोरोना भाइरसविरुद्ध विकास यानाच्वंगु खोपं ९० प्रतिशत तक सुरक्षा बिउगु समाचार पिहां वयेवं यदि खोप वल धायेवं दकलय् न्हापां सुनां खोप कायेखनी धयागु चर्चा परिचर्चा नं सुरु जूगु दु । अथेहे खोप व हे वल धाःसां थिके जुइगुलिं गरिबतय्सं याकनं खोप कायेखनी मखु धयागु चिउताः नं प्वंका हयाच्वंगु दु ।
खोप विकास यानाच्वंगु कम्पनी फाइजर व बायोएनटेकं थःपिंसं दयेकागु खोप ९० प्रतिशत स्वयां अप्वः सुरक्षा बिउगु थःपिनि प्रारम्भिक अनुसन्धानं क्यंगु खँ धाःगु दु । ४३ हजार स्वयां अप्वः मनूतय्त परीक्षण यायेधुंकूगु थ्व खोपपाखें बांलाःगु लिच्वः वःगुलिं खोप निर्माता कम्पनीं ‘विज्ञान व मानवताया निंतिं छगू महान न्हि’ धकाः धायेधुंकूगु दु । खोप विकासय् सफलता चूलना वःलिसे खोप दकलय् न्हापां सुनां सुनां कायेखनी धयागु नं सकसियां कौतुहलता व चिउताःया विषय जुयाच्वंगु दु । थज्याःगु चिउताः व्यापक जुयाच्वंसां खोप निर्माता कम्पनीतय्सं धाःसा धनी गरिब सकस्यां समान रुपय् खोप कायेखनीगु खँ धाःगु दु ।
दकलय् न्हापां ला खोप दयेकूगु कम्पनीतय्सं न्हापां खोप सुनां सुनां कायेगु धयागु निर्णय यायेदइमखु। ‘प्रत्येक संगठन व देशं हे दकलय् न्हापां सुयात व गुकथं खोप बीगु धयागु निर्णय याइ’ बेलायती वासः उत्पादन कम्पनी एस्ट्रोजेनका कम्पनीया कार्यकारी उपाध्यक्ष सर मिन पान्गालोसं बिबिसीयात कनादीगु दु । सुरुइ खोपया उपलब्धता सीमित जुइगुलिं ल्वगित मसीमा धकाः व स्वास्थ्य सेवा प्रणालीयात बचे याना तइपिं प्राथमिकताय् लाइ ।
थीथी देय्या सरकार व संगठन दुथ्याःगु खोप सम्बन्धी गठबन्धन ग्याभीया योजना कथं कोभ्याक्स नामं म्हसिका दइगु थ्व खोप विश्वब्यापी खोप योजनाय् सहभागी जूगु देय्या धनी वा म्हो आय दुपिं सकसिनं बराबरी हैसियतं कायेखनी । दकलय् न्हापां उत्पादन सुरु जुइगु छुं नं देय्या जनसंख्याया ३ प्रतिशतयात गाइकथं खोप उपलब्ध याइ । थ्व खोप उगु देय्या स्वास्थ्य सेवा व सामाजिक हेरचाह सेवाया जनशक्तियात बिइत गाइ । थ्व लिपा खोप उत्पादन यायां जनसंख्यायात २० प्रतिशतयात गाइ कथं खोप उपलब्ध याइ । थ्व पालय् ६५ दँ स्वयां च्वय्यापिं व जोखिमय्लाःगु समूहया मनूतय्त प्राथमिकताय् तयाः खोप बी । फुक्कं देशय् २० प्रतिशत खोप बीधुंकाः मेगु मापदण्डया आधारय् खोप वितरण जुइ । थथे याइबलय् देय्या कमजोर अवस्था व कोभिड १९ या तत्काल खतराया अवस्थायात स्वयाः खोप उपलब्ध याकी ।
LEAVE YOUR COMMENTS