अनियमितताया द्वपनय् कार कम्पनी निशानया अध्यक्ष ज्वन

जापानी कार उत्पादक कम्पनी निशानया अध्यक्ष व प्रसिद्ध व्यवसायी कार्लोस गोनयात आर्थिक अनियमितता याःगु द्वपनय् ज्वंगु दु । कम्पनीपाखें आकस्मिक पत्रकार सम्मेलन यानाः कालोसयात ज्वंगु खँ धाःगु दु । कम्पनीया प्रमुख कार्यकारी अधिकृत हिरोटो साइकावां बिहिवाः जुइगु कम्पनीया बोर्ड बैठकय् गोनया बर्खास्तीया निंतिं प्रस्ताव यंकेगु खँ पत्रकार सम्मेलनय् जानकारी बिउगु दु ।

रेनोया अध्यक्ष व प्रमुख कार्यकारी लिसें मिटसुबिसि मोटर्सया अध्यक्ष तकं जुयाच्वंम्ह गोनं थःगु कमाईया पूवंक विवरण मबिउगु व कम्पनीया सम्पत्ति व्यक्तिगत प्रयोजनया निंतिं छ्यःगु खँ धाःगु दु ।छम्ह मनुखं गोप्य रुपं सुचना बिइवं निशान कम्पनीया लेखापरीक्षकतय्सं छानविन सुरु याःगु खँ कम्पनीं धाःगु दु । ताःई तकया छानविन लिपा गोनयात हिरासतय् काःगु खः ।