
एजेन्सी – भारत व चीन दथुइ जूगु झडपय् चिनियाँ सैनिकतय्सं छ्यःगु हतियारया तस्बिर भारतं सार्वजनिक याःगु दु । थव झडपय् लानाः भारतया नीम्ह सैनिक सीगु खः । थ्व घटना लिपा निगू देय् दथुइ तनाव तच्वयाच्वंगु दु ।
भारतं सार्वजनिक याःगु हतियारया तस्विर स्वयेबल लद्दाखया गलवान उपत्यकाया एलओसी पाखे जूगु थ्व भिडन्तय् निगुलिं पक्षया सेनां आधुनिक हतियार, बन्दूक आदि छ्यःगु खनेमदु । आः सार्वजनिक याःगु तस्बिर कथं चिनियाँ सेनां छ्यःगु हतियार धयागु बुँ क्वायेत दयेकातइगु तःकू थें च्वंगु हतियार खनेदु । नँया कथिइ थाय्थासय् नँया हे काँटी थें पिकयातःगु हतियार छ्यःगु खनेदु ।
भारतया छम्ह वरिष्ठ सैनिक अधिकारीं उपलब्ध याकुगु धासें बिबिसीं थ्व किपा पितबिउगु खः । थ्वयां न्ह्यः थ्व तस्बिर दकल् न्हापां भारतया प्रतिरक्षा विश्लेषक अजय शुक्ला सामाजिक सञ्जाल ट्विटरय् तःगु खः ।
थ्व क्षेत्रय् गोली, बन्दूक, बारुद थेंज्याःगु अस्त्र छ्यले मदइगु व्यवस्था सन् १९९६ य् हे निगुलिं पक्षं याःगु खः । सीमाया विवादीत क्षेत्रय् निगुलिं पक्षं आक्रामक गतिविधि तच्वयेके मफयेमा धकाः थज्याःगु सहमति यानातःगु खः । सोमवाः चान्हय् निगू देय्या सेना दथुइ ४,२६७ मिटर उचाइलय्लाः गु हिमाली क्षेत्रय् भिडन्त जूगु खः । उबलय् गुलिखे सैनिकत भीरं कुतुं वनाः शून्य स्वयां क्वय्या तापक्रमय् न्ह्यानाच्वंगु गलवान खुसिइ कुतुं वंगु खँ धाःगु दु ।
LEAVE YOUR COMMENTS