अजू चायापुगु कासा अजू चायापुगु सिरपाः

थ्व संसारय् कासाया पारखीतय् निंतिं छुं म्होति मदु । विश्वय् लोकंह्वाःगु फुटबल, फुटसल, क्रिकेटनिसें कयाः टेनिस, स्वीमिंग, एथ्लेटिक्स, मार्शल आर्टया आपालं विधा दु । थ्व हे संसारय् थः हे कलाःयात कुबियाः ब्वाँय् वनेगु नं कासा दु । थथे धायेबलय् थ्व गज्याःगु कासा, गन जुइगु, गबले जुइगु, गथे यानाः ब्वति कायेगु धइगु आपालं न्ह्यसः दनेफु ।

थः हे कलाःयात ब्वहलय् कुबियाः ब्वाँय् वनेमाःगु थ्व कासा स्वयमय् अजू चायापुगु ला खः हे खत । उकिसनं कासा त्याकूम्हेसित बीगु सिरपाः नं उलि हे अजू चायापुगु व न्ह्यइपुसे च्वं । थः कलाःयात कुबिया ब्वाँय् वनेगु कासाय् न्हाप लाःम्हेसित मिसाया म्हया ग्यसु (तौल) गुलि दुगु खः उलि हे बराबरया बियर सिरपाः बी ।

थ्व कासा सन् १९९२ निसें फिनल्याण्डया सान्काज्भी धइगु सहरय् दँय्दसं जुया वयाच्वंगु दु । थुगुसी नं थ्व कासा वंगु छुं दिं न्ह्यः जक जूगु खः । कासाय् ब्वति कायेत फिनल्याण्डया नागरिकतय् सहभागिता ला दुगु हे जुल । थ्व बाहेकं इटाली, फ्रान्स, जर्मनी, अस्टे«लिया लगायतया थासं आपालं तिपुत नं सहभागि जूगु खः ।

थ्व कासाय् ब्वति कायेगु निंतिं छुं छुं नियम नं दु । थ्व नियम दुने मलाःपिंसं धाःसा कासाय् ब्वति काये खनी मखु । कासाया नियमकथं सहभागिया उमेर १७ दुपिं जुइमाः । थ्व स्वयां म्हो उमेरयापिंसं ब्वति काये खनीमखु । अथे हे कासाया मेगु नियमकथं कलाःम्हेसिया तौल ४९ किलो स्वयां अप्वः जुइमाः ।

यदि ४९ किलो स्वयां म्हो जुल धाःसा कासाया नियमकथं ४९ किलो दयेकेत उलि हे तौल बराबरया झोला जूसां कबीमाः । कासाय् ब्वति कायेत कलाः हे माः धयागु मदु । कलाः मदुपिं वा इहिपा मजूनिपिं मतिनामिपिं खःसा इमिसं नं ब्वति काये फइ । थ्व कासाया बारे मेगु छगू नं न्ह्यइपुगु खँ दु ।

व छु धाःसा यदि कलाः नं मदु, प्रेमिका नं मदु धइगु खःसा अज्याःपिंसं थः जःलाखःलाया कलाःयात जूसां कुबियाः ब्वति काये फइ । कासाया नियमकथं ब्वाँय् वनेगु ट्र्याक २५३.३ मिटरया दइ । थ्व ट्र्याकय् निगू सुख्खा पंगः जुइगु थाय् व छगू १ मिटर गाः हनाः लखं जायेकातःगु पुखू पार यायेमाः ।