प्रहरीया ल्हातय् धिमे
येँ – नेपाल प्रहरीं नं स्वनिगःया मौलिक बाजं धिमे थायेगु सयेकूगु दु । नेपाल प्रहरीया संगीत ब्याण्डयात थौंकन्हय् नेपाःया म्हसीका थें जुयाच्वंगु धिमे बाजं नं स्यनेगु जुयाच्वंगु खःसा प्रहरीया उगु ब्याण्डं थौंकन्हय् वहे धिमेया छकू कुचा थाय्थासय् थानाः क्यनेगु ज्या नं यानाच्वंगु दु ।
थौंकन्हय् न्ह्यानाच्वंगु महानगरीय प्रहरी दिवसया लसताय् प्रहरी ब्याण्डं म्हिगः व म्हीग यल व ख्वपय् धिमे लगायत मेमेगु बाजं थानाः क्यंगु खः । थौं येँय् मरुइ नं छगू ज्याझ्वःया दथुइ धिमे लगायत थीथी बाजं थाइगु ज्याझ्वः दु । थौंकन्हय् प्रहरी ब्याण्डं धिमेपाखें द्यः ल्हानाः छकू कुचा जक थायेगु यानाच्वंगु खः । छुं ई लिपा मुक्कं धिमे जक थानाः प्रहरी ब्याण्ड पिहां वयेगु समेत जुयाच्वंगु दु ।
प्रहरी ब्याण्डयात थ्व धिमे थयेगु ज्या धाःसा थौंकन्हय् धिमे प्रशिक्षक भाजु सुदन मुनिकारं यानाच्वनादीगु दु । वय्कलं वंगु वालय् जक प्रहरी ब्याण्डयात थ्व धिमे थायेगु सुरु यानादीगु खः । थौंया ब्वज्या लिपा प्रशिक्षण हानं सुरु जुइगु व करिब लछि लिपा थुकिया समापन जुइगु खँ प्रशिक्षक मुनिकारं ‘नेपालभाषा टाइम्स’ यात कनादिल ।
महाराजगंजस्थित प्रहरी संगीत विद्यालयय् वय्कलं न्हिंन्हिं धिमेया प्रशिक्षण बियादीगु खः । अन प्रहरी जवानंनिसें हवल्दार व असई तक दुथ्याःगु १५ म्हेसिया प्रहरी टीमयात धिमे प्रशिक्षण बिया च्वनादीगु दु । थ्व टीमय् परियार, खत्री, गुरुङ आदि गैर नेवाःत हे अप्वः दुथ्याः ।
प्रहरीपाखें नं धिमेयात नेपाःया छगू मौलिक बाजं जूगु कारणं प्रहरी बाजनय् थुकियात नं दुथ्याकेमाः धइगु महसुस यासें थुकिया प्रशिक्षण सुरु याकूगु खँ मुनिकारं कनादिल ।
प्रशिक्षण क्वचायेवं प्रहरीया पूूरा ब्याण्ड हे धिमे ज्वनाः सार्वजनिक ब्वज्याय् वइगु जानकारी नं वय्कलं बियादिल ।
LEAVE YOUR COMMENTS