मचापिं प्याखंम्वःतय् म्युजिक भिडियो

येँ(नेपालभाषा टाइम्स)- लिपांगु इलय् म्युजिक भिडियो निर्माण यायेगु क्रमय् तीव्रता वयाच्वंगु दु । न्हिं न्हिं धयाथें छगू लिपा मेगु म्युजिक भिडियो निर्माण यानाः सार्वजनिक यायेगु नं उतिकं अप्वया वनाच्वंगु दु ।

थ्व हे झ्वलय् मचापिं कलाकारत दुथ्याकाः छपु न्हूगु म्येँया म्युजिक भिडियो हालय् सार्वजनिक याःगु दु । कलाकारलिसें संचारकःमि सुरेन्द्र मानन्धरं निर्देशन यानादीगु ‘गुलि जक बांलाः छ’ म्येँया म्युजिक भिडियो छुं दिं न्ह्यः सार्वजनिक याःगु खः ।

पुलांम्ह राज्यमन्त्री रामवीर मानन्धरं छगू ज्याझ्वःया दथुइ म्युजिक भिडियोया पितब्वज्या यानादीगु खःसा ज्याझ्वलय् सिने पत्रकार विजयरत्न असंबरे, पुलांम्ह अतिरिक्त प्रहरी महानिरीक्षक विजयलाल कायस्थ, नांजाःम्ह निर्देशक आर्यम नकःमिं नुगःखँ तयादीगु खः ।

म्युजिक भिडियोय् नच्चापिं कलाकारपिं निर्वेश श्रेष्ठ, सर्गः मानन्धर, लूनिभाः मानन्धर व दृष्टि डंगोलं अभिनय यानादीगु दु । म्युजिक भिडियोया छाँयाकन रामबाबु मगरं यानादीगु खःसा सम्पादन इन्द्र मानन्धरं यानादीगु खः ।

निर्देशक मानन्धरं च्वयादीगु व वय्कलं हे लसय् हनादीगु म्येँ सुरेश मानन्धर व लजना मानन्धरं सः बियादीगु खःसा संगीत संयोजन जीवित जल्मीं यानादीगु खः ।