न्हूदँ हनेगु बारे मंकाः अपिल : मंसिर १ गते लाइगु तिथि कुन्हु न्हूदँ ११४१ हनेगु निर्णय
येँ (नेपालभाषा टाइम्स) – थुगुसी नं स्वन्ति नखः हनेगु सम्बन्धय् विवाद दुसां नेपाल संवत् ११४१ न्हूदँ हनेगु मू ज्याझ्वः धाःसा थ्वहे वइगु ने.सं. ११४१ कछलाथ्व पारु अर्थात वि.सं. २०७७ मंसिर १ गते सोमवाः कुन्हु यायेगु निर्णयजूगु दु । नेपाल संवत्या न्हूदँ हनेगु ज्याय् सक्रिय थीथी खलः पुचःतय् म्हिगः च्वंगु मंकाः मुँज्यां थ्व निर्णय याःगु खः । थ्वहे निर्णय आः देय्न्यंकं कार्यान्वयन याना यंकेगु निर्णय नं मुँज्यां याःगु दु ।
अथे हे थुगुसी कोरोना महामारीया कारणं तःधंगु सभा वा र्याली पिकायेगु सम्भावना मदुगुलिं न्हूदँया ज्याझ्वःत गुकथं न्ह्याका यंकेगु धइगु बारे नं मुँज्याय् सहलह जूगु खः । नेवाः देय् दबूया पहलय् न्हूदँ राष्ट्रिय समारोह समिति-११४१ या नायः रमेश महर्जनया सभापतित्वय् जूगु उगु भर्चुयल मुँज्यापाखें थुगुसी न्हूदँ हनेगु ग्वसाः व तिथियात कयाः छगू मंकाः अपिल जारी यायेगु नं क्वःछिउगु खः ।
नेवाः देय् दबूया नायः नरेश ताम्राकारं उगु अपिलया मस्यौदा प्रस्ताव यानादीगु खःसा उकी सामान्य संशोधन यानाः सार्वजनिक यायेगु निर्णय जूगु खः । अन न्ह्यब्वःगु मंकाः अपिलया मस्यौदाय् मंसिर १ गते लाइगु तिथि कुन्हु न्हूदँ हनेगु व स्वन्ति नखः धाःसा थःथःगु परम्पराकथं न्यायेका वनेगु खँ न्ह्यथनातःगु दु ।
ज्याझ्वलय् थःगु बिचाः तयादिसें नेवाः न्ह्यलुवा मल्ल के. सुन्दर, रमेश पिया व सुरेश किरणपिंसं नखः न्यायेकेगु तिथि थीथी कथं पिहां वःगु धइगु नेवाः दुनेया विवाद मखुसें विविधताया चिं जूगु कारणं उकियात विविध कथं हे न्यायेका यंकेमाःगु खँय् बः बियादीगु खः । नेवाः जाति अनेक कथंया विविधतां जाःगु समुदाय जूगु कारणं तिथिया गणना यायेगु विधिइ नं विविधता दुगुलिं उकियात नेवाः परम्पराया हे छगू छगू अंगया रुपय् स्वीकार याना वने माःगु व थुकिं नेवाः एकतायात क्वातुकीगु बिचाः नं अन वःगु खः ।
संस्कृतिविद् डा. चुन्दा वज्राचार्यं थुगुसी येँ महानगरपालिकां दयेके बिउगु नेपालभाषाया पाठ्यक्रमया प्यंगूगु तगिमय् शंखधर साख्वाः सम्बन्धी पाठ नं दुथ्याःगु जानकारी बियादिल । राष्ट्रिय विभूति शंखधर साख्वाः प्रतिष्ठानया नायः श्यामकृष्ण मानन्धरं न्हूदँ न्ह्यागु रूपं हनेगु याःसां उकी सरकारी सहभागिता छुटे याके मजिउगु बिचाः तयादिलसा नेवाः पत्रकार राष्ट्रिय दबूया नायः सुरजवीर वज्राचार्यं थुगुसीया न्हूदँयात सञ्चार माध्यमपाखें अप्वः थाय् बियाः यंकेमाःगु बिचाः तयादिल । उमेश स्थापितं सहजीकरण यानादीगु उगु ज्याझ्वलय् डा. पुष्पराज राजकर्णिकार, सुरेन्द्र वज्राचार्य, हिराकाजी महर्जनपिंसं नं बिचाः तयादीगु खः ।
मंकाः अपिलय् नेवाः देय् दबू, नेपालभाषा मंकाः खलः येँ, मंकाः खल यल, राष्ट्रिय न्हूदँ समारोह समिति-११४१, न्हूदँ समारोह समिति यल व शंखधर साख्वाः प्रतिष्ठानपाखें हस्ताक्षर यायेगु सहमति नं मुँज्याय् जूगु खः ।
LEAVE YOUR COMMENTS