रणजित मल्लया नाटक ‘पृथुप्याख्यान’या अभिलेख सफू पिदन

यल – लोक साहित्य परिषद्या ग्वसालय् जूगु छगू ज्याझ्वःया दथुइ जुजु रणजित मल्लं च्वयातःगु नाटक ‘पृथुप्याख्यान’या अभिलेख सम्पादन यानाः पिथनेगु ज्या जूगु दु । डा. ज्योति तुलाधरं विमोचन यानादीगु उगु अभिलेख सफूया सम्पादन सुनिता राजभण्डारीं यानादीगु खःसा प्रतिक डंगोलं पिथनादीगु खः ।

वाङ्मय शताब्दी पुरुष सत्यमोहन जोशीया छेँय् जूगु ज्याझ्वलय् उगु सफू पिथनेगु नापं नांजाःम्ह कोशकार पन्नाप्रसाद जोशीया जीवनीया लिधंसाय् च्वयातःगु नेपालभाषाया पूधाःप्याखं ‘वैद्यबाः’ नं क्यंगु खः । वाङ्मय शताब्दी पुरुष जोशीं च्वयादीगु उगु पूधाःप्याखंया निर्देशन सुनिता राजभण्डारीं यानादीगु खः ।

नेपालभाषाया वृहत शब्दकोष निर्माणलिपा उकिया प्रकाशनया ज्याय् वनाच्वंगु इलय् दुर्घटना लानाः मदुम्ह जोशी जीवनीयात कयाः च्वयातःगु पूधाःप्याखनय् शरद कसाः, पूर्णिमा शाक्य, मञ्जु श्रेष्ठ, धर्म श्रेष्ठ, मोहनदेवी प्रजापति, शाक्य सुरेन, नवीन थेच्वमि लगायत आपालं कलाकारतय्सं म्हितादीगु खः ।

परिषद्या नायः प्रा. प्रेमशान्ति तुलाधरं लसकुस यानादीगु ज्याझ्वलय् शताब्दी पुरुष जोशीं पूधाःप्याखनय् म्हितादीपिं कलाकारपिं सुभाय् पौ नं लःल्हानादीगु खः ।