
यल – नेवाः पत्रकार राष्ट्रिय दबू मिसा कवःया ग्वसालय् १०८ क्वःगु अन्तर्राष्ट्रिय नारी दिवसया लसताय् लाकाः पत्रकारिताय् लैंगिक संवेदनशीलता विषयय् छगू अन्तरक्रिया ज्याझ्वः जुल । मिसा विरुद्धया विभेदया अन्त्यया निंतिं पत्रकारिताय् लैंगिक संवेदनशीलताया आवश्यक जूगु खँय् ज्याझ्वलय् सहभागि वक्तातय्सं बः बिउगु खः ।ज्याझ्वलय् नेपालभाषा टाइम्स न्हिपौया सम्पादक सुरेश किरण मानन्धरं मेमेगु ख्यःयात नं जवाफदेही जुइत बाध्य याइगु संचारमाध्यम स्वयं लैंगिक संवेदनशीलताय् ध्यान बीमाः धयादिल । संचारमाध्यमय् मिसातय्गु बारे म्हो जक समाचारय् थाय् बीगु खँ न्ह्यथँसें वय्कलं धयादिल, ‘मिसातय्गु बारे समाचार पिहां वःसां यौन दुव्र्यवहार, बलात्कार, यौन शोषण व घरेलु हिंसाया जक अप्वः वयेगु यानाच्वंगु दु, मिसातय्गु बारे बांलाःगु समाचारयात अपेक्षाकृत रुपं थाय् बियाच्वंगु मदु ।’
राससया पुलांम्ह महाप्रबन्धक लिसें क्रियाशील महिला पत्रकार मंचया उपाध्यक्ष निर्मला तुलाधर आचार्यं मिसातय्त स्वयेगु सामाजिक दृष्टि व पेशागत संवेदनशीलता थुइके मफुगुलिं पत्रकारिता क्षेत्रय् दुहां वयेगु नापं त्वःताः वनीपिं मिसातय् ल्याः नं उतिकं दु धयादिल । छेँज्या व मस्तय्त स्वयेमाःगुलिं नं पत्रकारिता पेशा त्वःतीपिं मिसातय् ल्याः अप्वया वनाच्वंगु वय्कःया धापू दु । उगु इलय् दबूया केन्द्रीय नायः श्रीकृष्ण महर्जनं मिसातय्गु विषयया समाचारयात मिजंतय्गु दृष्टिं मखसे मिसाया हे दृष्टि, मिसातय्त लाइगु प्रभावया विषयय् पत्रकारिता नं संवेदनशील जुइमाः धयादिल ।
ज्याझ्वःया संयोजक नापं रेडियो नेपालया नेपालभाषाया समाचारवाचिका रचना श्रेष्ठं थीथी संचारमाध्यमय् मिसा पत्रकारमैत्री संरचना दुगु व व्यवहार नं मजू धयादिसें संचार संस्था, प्रकाशन गृह व उकिया सम्पादक थ्व विषयय् गम्भिर जुइमाःगु खँय् बः बियादिल । अथे हे रेडियो नेपालया हे संचारकःमि चन्दा विष्टं मिसातय्गु चरित्र हत्यालिसें स्वानाः मनोबल कुहां वइगु कथंया कासा न्ह्याथेंज्याःगु पेशाय् नं जुइगु चर्चा यासें उकिया अन्त्यया निंतिं लैंगिक संवेदनशीलता आवश्यक जू धयादिल ।
LEAVE YOUR COMMENTS