पासवर्डया कारणं ज्यान वन

थौंकन्हय् हरेकसिया ल्हातय् मोबाइल दु । मचांनिसें ज्याथजिथिपिंसं तक अले न्ह्यागु हे पेशा याना जुइपिं छाय् मजुइमा मोबाइल घाना जूगु झीसं खंकेफु । मोबाइल थौं मानव जीवनया निंतिं अपरिहार्य जक मखु थ्व छगू अंग जुया बी धुंकूगु दु ।मोबाइल घायेगु जक मखु, उकीच्वंगु फोन नम्बर, मेसेज, फोटो लगायत डेटा सुरक्षित जुइमा धकाः उकियात ‘पासवर्ड’ वा ‘प्याटर्न’पाखें मोबाइल लक यानाः तयेगु नं यक्वसिनं यानातयेगु याः ।

तर थ्व हे पासवर्ड नं मनूया निंतिं गुलि घातक धइगु उदाहरण इन्डोनेसियाया छगू घटनां क्यंगु दु । पश्चिम इन्डोनेसियाया नुसा टेंगोरा प्रदेशया पूर्वी लम्बोर्क रिजेन्सीइ थःगु मोबाइलया पासवर्ड मबिउगु तमं छम्ह मिसां थः हे भाःतयात म्वाःम्वाकं च्याकाः स्याना बिउगु दु । डेडी पुरना नांया मनुखं थःगु हे छेँया पौ मर्मत यानाच्वंगु इलय् वया कलाः इल्हाम चाहयानी वयागु न्ह्यःने वल ।

कलाःम्ह इल्हामं डेडीयाके वयागु मोबाइलया पासवर्ड फ्वंगु इलय् मबीवं निम्हतिपूया दथुइ अन हे ल्वापु जुल । ल्वापुया हे झ्वलय् डेडीं थः कलाः इल्हामयात ल्हाः वानाबिल । निम्हतिपूया दथुइ जूगु ल्वापु तच्वया वनाः छम्हं मेम्सिया ज्यान कायेगु स्थितिइ तक थ्यन । कलाःम्ह इल्हामं तमं पिहां वनाखतं पेट्रोल कया हयाः भाःतम्ह डेडीयात छ्वाकाबिल । वयां लिपा मि तयाबिल । मिं नयाः बांमलाक घाःपाः जूम्ह डेडी घटना जूगु निन्हु लिपा मंत ।

घटनायात कयाः प्रहरीं इल्हामयात ज्वनाः अनुसन्धान याःगु इलय् इल्हामं थःपिनिगु दथुइ मोबाइलया पासवर्डयात कयाः ल्वापु जूगु व पासवर्ड मबिउगुलिं तमं पेट्रोलं लुनाः मि तया बियागु बयान बिउगु दु । इन्डोनेसियाया पूर्वी लम्बोर्क प्रहरीं घटनाया छानविन यायेगु झ्वलय् भाःतयात स्याःम्ह इल्हामं न्हापां ला घटनायात गुपचुप तयेगु कुतः याःगु जुयाच्वन, लिपा भाःतम्ह सीवं उकियात जानकारी बिउगु खँ धाःगु दु ।