ग्वय्स्वांया भाः कुहां वल

येँ – बजारय् माग स्वयां अप्वः ग्वय्स्वां ह्वयेवं ग्वय्स्वांमाःया भाः कुहां वंगु दु । वंगु दँय् ग्वय्स्वांमाःया अभाव जुयाः स्वांया भाः थहां वंगु खःसा थुगुसी नं स्वांमाःया भाः थहां वनी धकाः तरकारी खेती यानाच्वंपिंसं नं स्वां पिउगुलिं स्वांया उत्पादन अप्वयाः भाः कुहां वःगु खँ ख्वपया गुण्डुया किसानतय्सं धाःगु दु ।

वंगु दँय् गुण्डुया किसानं जक स्वां पिनाः लाखौं तका कमे याःगु खःसा थुगुसी धाःसा स्वांमाः खेती अप्वः जूगुलिं लागत तकं उठे मजुइगु अवस्था वःगु खँ स्थानीय किसानं धाःगु दु । वंगु दँय् म्होति नं ३० निसें ५० तका स्वांमाः मीगु खःसा थुगुसी झिंन्हय्तकां निसें झिंच्यातकां स्वांमाः मी मालाच्वंगु खँ स्थानीय किसानं धाःगु दु ।

येँय् हे ग्वय्स्वां छमाःया नीतकांनिसें सुइतकाः मियाच्वंगु खँ छम्ह व्यापारी धाःगु दु । बजारय् स्वांमाः अप्वः दुगुलिं भाः कुहां वःगु खँ नं उम्ह व्यापारी धाःगु दु । स्वांया भाः कुहां वयाः उपभोक्तायात राहत जूगु दुसा स्वांया खेती यानाच्वंपिं किसान धाःसा आहत जूगु दु ।