ने. सं. ११४४ ञलाथ्व दशमी -

अस्पतालय् जुइगु तोडफोडया घटना पनेत कुतः

येँ – अस्पतालय् वासः यायेत हःम्ह ल्वगिया मृत्युलिपा गुलिखे अवस्थाय् असहज परिस्थितिया सामना यायेमाःगु जुइ । अस्पतालया चिकित्सकं लापरवाही याःगु द्वपं ल्वगिया थःथितिपिंसं बी । अले अस्पताल परिसरय् प्रदर्शन व तोडफोडया घटना जुइ । प्रहरीं बल प्रयोग यानाः गुलिखे घटना नियन्त्रणय् कायेमाःगु अवस्था तःक्वः तःक्वः हे जुया वयाच्वंगु खायुगु सत्य दु ।

पिनेया जिल्लाय् जक मखु, राजधानी येँया गुलिखे अस्पतालय् तकं अज्याःगु घटना जुयाच्वंगु दु । छुं दँ न्ह्यव चितवनय् गःपःया शल्यक्रिया यायेमाःम्ह ल्वगिया मचाछेँ लिकयाः वांछ्वया बिउगु घटना तसकं चर्चाय् वःगु खः । तर दक्वं घटनाय् चिकित्सकया लापरवाही नं जुइमखु ।

अज्याःगु घटना लिपा ब्वलनीगु परिस्थितियात पनाः गुकथं कानूनी रुपय् समस्या समाधान याये फइ धइगु खँयात कयाः आतक सुनानं गुगुं कथं ध्यान बिया मच्वंगु अवस्थाय् येँ महानगरपालिका वडा नं. ७पाखें धाःसा बिस्कं छगू कुतः न्ह्याकूगु दु । वडाअध्यक्ष शुद्धकुमार डंगोलं छगू सन्देश वनेमाः धइगु ल्याखं अस्पताल परिसरय् जुइगु अज्याःगु घटना पनेगु कुतः न्ह्याकागु धयादी ।

उगु वडा लागाय् जक समता अस्पताल, ओम अस्पताल, दीर्घायु गुरु अस्पताल, हेल्पिङ ह्याण्ड, सामुदायिक अस्पताल, मेडिकेयर अस्पताल लगायतया अस्पताल दु । थुपिं अस्पतालय् तःक्वः तःक्वः हे प्रदर्शन दोहरे जुइगु जुयाच्वंगुलिं गुकथं उकियात पने फइ धकाः पहल न्ह्याकागु वडाअध्यक्ष डंगोलं कनादिल ।

वंगु लछिया दुने उगु वडाय् लाःगु निगू अस्पतालय् वासः यायेत हःम्ह ल्वगि सीगु विषययात कयाः तःधंगु हे प्रदर्शन जुल । प्रहरीं नं टियर ग्यास प्रयोग यानाः आन्दोलित हुलयात नियन्त्रणय् काःगु खः । येँया बौद्धय् च्वंगु समता अस्पतालय् थ्व हे वंगु असार ३ गते रामेछाप दोरम्बा छेँ जुयाः उगु हे अस्पतालय् ज्या याइम्ह २७ दँ दुम्ह विमला तामाङ यगानाच्वंगु अवस्थाय् लूगु खः ।

उगु घटना लिपा जूगु प्रदर्शनं अस्पताल तनावग्रस्त जुल । ल्वगि व इमि थःथिति जक मखु, स्थानीय तकं प्रभावित जुल । आन्दोलनयात मत्थर यायेत प्रहरीं टियर ग्यास हे प्रयोग यायेमाःगु अवस्था वल । अस्पताल आतकं संचालनय् वये फुगु मदुनि ।जेठ २९ गते येँया चाबहीस्थित ओम अस्पतालय् वासः याकाच्वंम्ह सिन्धुपाल्चोकया छम्ह मिसा सीगु विषययात कयाः वयाः थःथितिपिंसं याःगु प्रदर्शनया कारणं नं अज्याःगु हे परिस्थिति ब्वलन ।

थ्व स्वयां न्ह्यःनं थीथी अस्पतालय् तःक्वः तःक्वः हे तोडफोडसहितया प्रदर्शन जूगु दु । जिल्लाय् नं अज्याःगु घटना दोहरे जुया वयाच्वंगु दु ।
अस्पतालया लापरवाही हे जूसां नं उकियात कानूनी उपचारया लँपु नालेत स्वयेगु पलेसा अस्पतालय् हे प्रदर्शन व वार्ता यायेगु ज्या जुल धाःसा उकिं नकारात्मक लिच्वः लायेफु ।

वडाअध्यक्ष डंगोलं धयादी, ‘छगू घटनाय् ला जि थः हे पःखालं तिंन्हुयाः बिसिउँ वनेमाःगु अवस्था वल, निर्दोष स्थानीयं गोली नयेमाःगु अवस्था वयेत्यन, उकिं गुकथं जिउ अज्याःगु समस्यायात सही रुपय् व्यवस्थापन यायेत धकाः पहल न्ह्याकागु खः ।’

अस्पताल छगू संवेदनशील थाय् जूगुलिं सीम्ह तयाः अस्पतालय् नारा जुलुस यायेबलय् मेपिं ल्वगियात लिच्वः लाकी धासें वय्कलं धयादिल, ‘अनुसन्धान याइगु निकाययात थुकिया जिम्मा बी, सरकारया आधिकारिक निकायं घटनाया छानविन यानाः दोषीयात कारवाही यायेमाः, तर सेवा दिके मजिउ ।’

थ्व हे विषयय् छुं दिं न्ह्यः जक गौशालास्थित ७ नं. वडा ज्याकुथिइ उगु अस्पतालया प्रतिनिधि, प्रहरी प्रशासन व जनप्रतिनिधिया सहभागिताय् सहलह जुल । सहलहय् जनप्रतिनिधि व प्रहरीलिसें मेडिकेयर अस्पतालया प्रतिनिधि हरिभक्त सिग्देल, दीर्घायु गुरु अस्पतालया महेशराज उप्रेती, ओम अस्पतालया बाबुकाजी कार्की, हेल्पिङ ह्याण्ड अस्पतालया डा. कृष्ण अधिकारीया सहभागिता दुगु खः ।

महानगरीय प्रहरी ज्याकू येँया प्रमुखलिसें वरिष्ठ प्रहरी उपरीक्षक उत्तमराज सुवेदीं अस्पतालय् ब्वलने फइगु परिस्थितियात गुकथं न्यूनीकरण यायेगु व कानूनी लँपु नाले बीकेगु धइगु खँय् हे सहलह केन्द्रीत जूगु धयादिल । अज्याःगु घटनाय् न्हापां ला अस्पताल हे जवाफदेही जुइमाः ।

घटना जुइ सातकि प्रहरी व वडा ज्याकुथिइ सुचं बीगु, घटनाया जवाफ बीत आधिकारिक मनू तयेगु, चिकित्सक व थीथी निकाय दथुइ मंकाःकथं दयेकूगु समितियात सक्रिय यायेगु विषयय् सकलें सहमत जूगु दु ।‘छुं मयायेगु धइगु स्वयां नं छुं न छुं कुतः जुल धाःसा छुं प्रतिशतय् जूसां नं अज्याःगु घटना न्यूनीकरण जुइ नि, अभियान वडापाखें शुरु जुल आ महानगरस्तरीय सहलह यायेगु धइगु नं खँ जूगु दु, थुकिं छुं सकारात्मक सन्देश वनी’ सुवेदीं धयादिल ।