थौं बाघ भैरव जात्र

किपू (नेपालभाषा टाइम्स)- किपूया नांजाःम्ह बाघ भैरव द्यःया जात्रा थौं जुयाच्वंगु दु । दँय्दसं भदौ १ गते किपुलिइ बाघ भैरवया जात्रा याइगु चलन दु ।

थौं जात्राया झ्वलय् द्यःयात सुथय् हे क्वय् हयाः आलंगालय् ख्वालय् सिकी । वयां लिपा हानं च्वय् देगलय् तुं तइ । वयां लिपा द्यःयात खतय् तयाः किपू देय् चाःहीकेगु याइ । थुकियात द्यःया बुसादँया रुपय् नं कायेगु याइ । थ्व जात्रा विसं २०१३ सालंनिसें तिनि शुरु जूगु खः।

आजुद्यःया चन्दा बाकस चायेकल
थ्वहे झ्वलय् म्हिगः बाघ भैरव द्यःयाथाय् तयातःगु चन्दा बाकस चायेकूगु दु । थीथी कारणं यानाः ताःई न्ह्यवंनिसें मचायेकुसे तयातःगु उगु चन्दा बाकस म्हिगः किपू नपा वडा नं. १ या वडा अध्यक्ष हिरालाल महर्जनया रोहवरय् चायेकेगु ज्या जूगु खः ।

चन्दा बाकस चायेकाः उकी च्वंगु ध्यबा नं म्हिगः निने सिधयेकूगु दु । चन्दा बाकसय् १ लाख २९ हजार ७२० तका दां दुगु खँ धाःगु दु ।
थ्व ध्यबा आः बाघ भैरव द्यः, देगः व देगःया लागाय् दयेकेगु, यचुपिचु यायेगु ज्याय् छ्यलीगु खँ धाःगु दु । जात्राया छन्हु चायेकूगु जूसां चन्दा बाकसया ध्यबा जात्राया ज्याय् खर्च मयाइगु खँ नं धाःगु दु । किपुलिइ बाघ भैरवयात स्थानीय मनूतय्सं आजुद्यःया रुपय् हनेगु याना वयाच्वंगु दु ।