जसपाया प्यम्हं मन्त्री चीकल

येँ (नेपालभाषाा टाइम्स)- अन्ततः प्रधानमन्त्री शेरबहादुर देउवां जनता समाजवादी पार्टीया प्यम्हं मन्त्रीतय्त मन्त्रिमण्डलं चीका छ्वःगु खः । जसपाया मन्त्रीतय्त चीकेगु लागिं प्रम देउवां वंगु स्वन्हु न्ह्यवंनिसें हे सहलह यानाच्वनादीगु खःसा थौं उकियात कार्यान्वयन यानादीगु खः । वर्तमान सरकारय् जसपापाखें राजेन्द्र श्रेष्ठ, मोहम्मद इस्तियाक राई, मृगेन्द्र कुमार सिंह यादव व प्रदीप समेत यानाः प्यम्ह मन्त्रीत दु ।

जसपा समर्थित कानूनविद्तय्सं धाःसा वर्तमान सरकार कामचलाउ सरकार जुइधुंकूगु व जसपां थ्व सरकारयात बियातःगु समर्थन नं लित मकाःनिगु कारणं यानाः प्रधानमन्त्रीं मन्त्रीत थपे यायेगु वा लिकायेगु थेंज्याःगु महत्वपूर्ण ज्याखँत याये मदइगु जूगुलिं थुकिया विरुद्ध मुद्दा लाये फइगु खँ धाःगु दु । अथे हे जसपाया छम्ह वरिष्ठ नेतां धाःसा संघीय सरकारपाखें जसपाया मन्त्रीत चीका हःगुलिं आः मधेस प्रदेशय् नं जसपाया सरकारं कांग्रेसया मन्त्रीत चीके फइगु खँ कनादीगु दु ।