भारतं स्वंगू लाख तफ्वःस्वांमाः हल

येँ – स्वन्ति सुुरु जुइवं तफ्वःस्वांया बजाः नं सुरु जूगु दु । स्वां व्यवसायीतय्सं स्वन्तिया निंतिं भारत निसें तफ्वःस्वां हयेधुंकूगु दु । नेपालय् उत्पादन जूगु स्वांनं जक मगानाः भारतं स्वां आयात जूगु खँ फ्लोरिक्लचर एशोसियसनया अध्यक्ष कुमार कसजु श्रेष्ठं धयादीगु दु । तफ्वःस्वां अप्वः यानां लक्ष्मी पुजा कुन्हु तक यक्व चुइगु जुयाच्वंगु दु ।

थ्व दँय् भारतं ३० लाख तका बराबरया स्वंगू लाख स्वांमाः हयेधुंकूगु खँ वय्कलं कनादीगु दु । थुगुसी भारतं म्हो जक स्वां हयेगु बिचाः जूगु खःसां स्वांया माग अप्वःगुलिं आयात नं वृद्धि जूगु खँ वय्कलं धयादीगु दु ।‘थौंकन्हय् स्वदेशय् हे ९० प्रतिशत स्वां उत्पादन जुइधुंकूगु दु । थगुने तक दँय्१८ प्रतिशत स्वां भारतं आयात यायेमाःगु अवस्था दुगु खः’ राससलिसे खँ ल्हासें वय्कलं धयादीगु दु ।

थुगुसी तफ्वःस्वांमाः छमाःया ६० निसें ७० तका तक पुलेमालीगु खँ धाःगु दु । थगुने स्वांमाः छमाःया ५० निसें ६० तका थ्यंगु खःसा थुगुसी भचा थिके जूगु दु । फ्लोरिकल्चर एशोसियसनया कथं थुगुसी न्हापा स्वयां निगू लाख अप्वः स्वांमाः खपत जुइगु खनेदु । थगुने स्वन्तिबलय् १५ लाख स्वांमाः खपत जूगु खःसा थुगुसी बजारय् १७ लाख स्वांमाःया माग दुगु खँ धाःगु दु ।

स्वन्तिबलय् अप्वः छ्यलीगु तफ्वःस्वां, ग्वय्स्वां व गोदावरी स्वां मध्ये तफ्वःस्वां जक भारतं आयात यायेमाःगु अवस्था दु । ग्वय्स्वां व गोदावरी स्वां स्वदेशय् हे माक्व उत्पादन जुयाच्वंगु दु । थुगुसी स्वन्ति न्हापा दँ स्वयां भचा लिउने लाःवंगु दु । अथे जूगुलिं पात्रो स्वयाः स्वां पिउपिनि स्वां जक व्यावसायी रुपं छ्यलेफइगु अवस्था दुगु व मेपिनिगु स्वां सुकूचिना वनेधुंकूगु खँ धागु दु ।

अथे जूगुलिं नं थुगुसी स्वां भचा थिके जूवंगु खँ धाःगु दु ।नेपालय् थौंकन्हय् १० निसें १५ प्रतिशत स्वां उत्पादन अप्वया वनाच्वंगु दु । थुकिया लिसेलिसें माग नं अप्वया वनाच्वंगु दु । स्वन्तिबलय् दकलय् अप्वः स्वनिगलय् हे स्वां खपत जुइ । स्वनिगलय् जक थ्यंमथ्यं ६० प्रतिशत स्वांमाः खपत जुइगु खँ धाःगु दु । थगुने १ अर्ब ८५ करोड तका बराबरया स्वां कारोवार जूगु खः ।