स्वन्तियात माक्व मत
नेपाल विद्युत प्राधिकरणं थुगुसी स्वन्तिया लक्ष्मीपुजा कुन्हु जुइगु विद्युतभारया व्यवस्थापन याःगु दु । नेपाःमितय् निगूगु तःधंगु नखः स्वन्तियात ध्यानय् तयाः छवाः न्ह्यवंनिसें हे विद्युतभारया व्यवस्थापन याना वयाच्वनागु नेपाल विद्युत प्राधिकरणया कार्यकारी निर्देशक कुलमान घिसिंङं जानकारी बियादिल ।
विद्युत उपभोगय् छुं नं समस्या वइमखु धासें वय्कलं धुक्क जुयाः विद्युत उपभोग यानाः स्वन्ति न्यायेके फइ धयादिल । मतया नखः धयातःगु स्वन्तिया इलय् थनिं स्वदँ न्ह्यः विद्युत भार क्वपालेवं स्वन्ति खिउँसे च्वनाः खाइसे अनुभव यायेमाःगु खः । वि.सं. २०७३ सालय् लक्ष्मीपुजाकुन्हु हे प्राधिकरणं स्वनिगलय् विद्युतभार क्वपालेगु अन्त्य जूगु घोषणा याःगु खः ।
थौंतक नं देशय् विद्युतभार क्वपालेगु ज्या जूगु मदुनि । लक्ष्मीपुजाया न्हिकुन्हु विद्युत खपत अप्वइगु जूगुलिं आवश्यक व्यवस्थापन यानागु खँ न्ह्यथँसे प्राधिकरणया प्रवक्ता प्रवल अधिकारीं धयादिल, ‘आः विद्युत उपभोगया प्रोत्साहन यायेमाःगु अवस्था वयेधुंकूगु दु, धुक्क जुयाः मत च्याकाः स्वन्ति हनादीसां जिउ ।’
वय्कःया कथं थुगुसी लक्ष्मीपुजाया दिंकुन्हु जक झण्डै १०० मेगावाट विद्युतभार थप जुइगु अनुमान दु । थगुने ११६५ मेगावाट विद्युतभार लक्ष्मीपुजाया दिं कुन्हु दुगु खः । थुगुसी विद्युतभार अप्वया १,२५० मेगावाट थ्यनीगु अनुमान प्राधिकरणया दु । किफायती उपकरणया प्रयोग व सचेतनाया कारणं विद्युत व्यवस्थापन यायेत सहज जूगु धापू दु ।
स्वनिगः दुनेया मेमेगु ग्रिडर सबस्टेशनयात तकं स्वन्तियात लक्षित यानाः मर्मत यायेधुंकूगु दु । वितरण प्रणाली व्यवस्थित यायेत व ओभरलोड जुइके मबीत थीथी क्षेत्रय् ट्रान्सफर्मर व फेज व्यवस्थापन यानागु प्राधिकरणं जानकारी बिउगु दु ।
स्वन्तियात हे केन्द्रीत यानाः प्राधिकरणं भारतलिसेया विद्युत व्यापारयात चुस्त यायेगु कुतः यानाच्वनागु प्रवक्ता अधिकारीं धयादिल ।
दक्वं विद्युत आयोजनायात फक्व अप्वः क्षमताय् चले यायेत निर्देशन बीधुंगु प्राधिकरणया धापू दु । प्राधिकरणया कुल जलविद्युत क्षमता ५०७ मेगावाट दुसां नं ४०८ मेगावाट जक उत्पादन जुयाच्वंगु दु ।
स्वन्तिया निंतिं धकाः हे कालीगण्डकी ‘ए’ १४४, मध्यमस्र्या·दी ७० व मस्या·दी ६९ मेगावाट उत्पादन क्षमताया आयोजनापाखें अप्वः खपत जुइगु बहनिसिया ईया लः मुंकाः जूसां नं पूर्णजडित क्षमताय् विद्युत उत्पादन यायेगु व्यवस्था मिले यानागु प्रवक्ता अधिकारीं जानकारी बियादिल ।
स्वन्तिइ उद्योगधन्दा अप्वःथें बन्द जुइगुलिं नं विद्युत वितरण प्रणाली सहज जुइगु विश्वास प्राधिकरणया दु । ढल्केबर–मुज्जफरपुर अन्तरदेशीय प्रशारण लाइनपाखें थप विद्युत आयात याये फइकथं व्यवस्थापन याःगु दु । ‘स्वन्तिया निंतिं हे धकाः विद्युत हयेमाःगु अवस्था मदु’, प्रवक्ता अधिकारीं धयादिल, ‘नेपाः व भारतया दक्वं प्रशारण लाइन चुस्त दयेकागु दु, आपतकालीन अवस्थाय् जक थप आयात यायेगु जुइ ।’
न्हापा लिपा संचालनय् हयेगु मयानाच्वंगु १४ मेगावाटया हेटौंडा थर्मलप्लान्ट नं स्वन्तिया निंतिं आवश्यक जुल धाःसा संचालन यायेगु तयारी जुयाच्वंगु दु । प्रशारण व्यवस्थापनय् दक्वं ग्रीड सबस्टेशनय् ट्रान्सफर्मर, ब्रेकर, केबल व मेमेगु उपकरण मर्मत यानाः तयारी अवस्थाय् तयातःगु दु ।
प्राविधिक समस्या वःसा तत्काल विशेष प्राविधिक पुचः खटे यायेत चौबिसै घन्टा निगरानी तयाच्वनेगु नं न्ह्यथंगु दु । थगुने लक्ष्मीपुजाय् ख्वपया सबस्टेशनय् छुँया कारणं वःगु खराबीतकं निराकरण यायेगु कुतः जुयाच्वंगु दु । स्वनिगः दुनेया मेमेगु ग्रिडर सबस्टेशनयात तकं स्वन्तियात लक्षित यानाः मर्मत यायेधुंकूगु दु ।
वितरण प्रणाली व्यवस्थित यायेत व ओभरलोड जुइके मबीत थीथी क्षेत्रय् ट्रान्सफर्मर व फेज व्यवस्थापन यानागु प्राधिकरणं जानकारी बिउगु दु । ओभरलोड जूगु फिडरय् म्हो भार दुगु फिडरं विद्युतभार हिले फइगु व्यवस्थातकं मिले यानागु प्रवक्ता अधिकारीं धयादी ।
येँय् दुने अण्डरग्राउण्ड दुगु चपली महाराजगंज ११ किलोभोल्ट डबल सर्किटलाइन चालू यानागु व महाराजगंज क्षेत्रय् बालाजु सबस्टेशनय् वइगु विद्युतया समस्या उगु लाइनपाखें आपूर्ति याइगु जूगु दु । येँया लैनचौर सबस्टेशनपाखें बालाजु व न्यू–चाबही निगुलिं क्षेत्रय् विद्युत हये फइगु व्यवस्था मिले यानातःगु दु ।
स्वनिगलय् अप्वःलय् ३५० मेगावाट खपत जुइगु यानाच्वंगु दु । स्वनिगः अन्तर्गत नुवाकोट, धादिङ, काभ्रेपलाञ्चोक, रामेछाप व दोलखा कःघानातःगु दु । स्वनिगः व उकिया जःखःया जिल्लाय् थगुने स्वन्तिं २८५ मेगावाट विद्युतभार दुगु खः । थुगुसी स्वन्तिइ धाःसा ३२० मेगावाट थ्यनीगु अनुमान यानातःगु दु ।
नेपालय् थौंकन्हय् विद्युत प्राधिकरणमार्फत ४०९ व निजी ख्यलं ३५६ मेगावाट विद्युत उत्पादन जुयाच्वंगु दुसा भारतं अप्वलय् ३८० मेगावाट आयात जुयाच्वंगु दु । नेपालय् उद्योग क्षेत्रं न्हिं ३०० मेगावाट विद्युत खपत यायेगु यानाच्वंगु दु ।
LEAVE YOUR COMMENTS