चाबही गणेद्यया जात्रा शुरु
येँ(नेपालभाषा टाइम्स)÷ चन्द्रविनायक अर्थात चाबही गणेद्यःया जात्रा म्हिगःनिसें शुरु जूगु दु । चाबही गणेद्यःलिसें भैरव जात्रा चाबही लागाय् शुरु जूगु खः । दँय्दसं कछलाथ्व सकिमिला पुन्हिनिसें कछलागा तृतियातक जात्रा न्ह्याइ ।
करिब स्वसःत्या दँ पुलांगु विश्वास यानातःगु चाबही गणेद्यः व भैरव जात्रा विशेष यानाः चाबही लागाया पशुपति, ग्वल, जयबागेश्वरी, मित्रपार्क, चुच्चेपाटी लागाय् जुइ । नेपाल संवत् ८०१ य् जुजु भूपालेन्द्र मल्लं थ्व जात्रा चले याःगु धइगु विश्वास यानातःगु दु ।
स्वनिगःया प्यम्ह गणेद्यः (विनायक)मध्ये छम्ह चाबही गणेद्यःया जात्राया झ्वलय् न्हापांगु दिंकुन्हु म्हिगः चिचिधिकःपिं मस्तय्त कुमार व कुमारि भाःपियाः म¥हःजा नकूगु खः । पशुपति अमालकोट कचहरीया द्वारे पूर्ण डंगोलं म्हिगः सुथ् चाबही गणेद्यःया देगलय् विशेष पुजा यानादीगु खःसा अनंलिा जात्रा शुरु जूगु खः । जात्राया हे झ्वलय् म्हिगः बहनी चाबही गणेद्यःया देगः परिसरय् सिलाचः¥हेबलय् थे सिँ च्याकाः धुनी जगे याःगु खः । थन धुनी जगे यायेत अमालकोट कचहरीं सिँ उपलब्ध याकेमाःगु परम्परा दु ।
जात्राया हे झ्वलय् थौं निन्हुया दिं सुथय् द्यः ल्ह्वनेगु ज्या जूगु दुसा थौं हे हलिमलि ब्वइगु परम्परा दु् । थौं बहनि कःनि, मुस्या, छुस्या, सकि, चाकुहि आदिया कलात्मक रुपं हलिमलि ब्वयाःबहनि भक्तजन व जात्रा स्वःवःपिंत इनाबी । थौं हे गणेद्यः व भैरवया खःयात देगः परिसरया परिक्रमा याकाः गंगाहितिइ यंकाः स्नान नं याकी । स्नान सिधयेकाः बहनि निगुलिं द्यःखःयात चारुमति विहारय् तये यंकी ।
थुकथं जात्राया झ्वलय् स्वन्हुया दिंकुन्हु निगलं द्यःखःयात पशुपति यंकाः महाद्यःया दर्शन याकेगु व लिपांगु दिंकुन्हु कचहरीया द्वारें अबिरसहितं पुजा यायेवं जात्रा क्वचाइ ।वयां लिपा जात्रा सफलतापूर्वक क्वचाःगु धासें शनिवाः चाबही लागाय् सिन्दूर जात्रा जुइ ।
LEAVE YOUR COMMENTS