आयोग फुक्कं खाली
जातीय समुदायया आयोगयात सरकारया बेवास्ता
येँ – देय्या समावेशी चरित्रयात राज्यपाखें सम्बोधन यायेगु लागिं संविधानय् व्यवस्था यानातःकथं गठन याःगु फुक्क हे आयोगया अध्यक्ष छम्ह जक नियुक्त यानाः मेपिं दुजःत नियुक्त मयाःगुलिं अज्याःगु आयोगत दुसां नं मदु सरह जुयाच्वंगु दु ।सरकारं वंगु माघ महिनाय् छक्वलं न्यागू आयोगया अध्यक्ष नियुक्त याःगु खः ।
तर अध्यक्ष छम्ह जक नियुक्त यानाः उकी दयेमाःपिं मेपिं सदस्यत धाःसा आः तक नियुक्त मयाःगुलिं फुक्क आयोगत पंगु जुयाच्वंगु दु ।
वंगु माघ महिनाय् सरकारं मुस्लिम आयोग, थारू आयोग, मधेसी आयोग, प्राकृतिक श्रोत तथा वित्त आयोग व समावेशी आयोग गठन यासें उकिया अध्यक्ष समेत तोके याःगु खः ।
फुक्कं आयोगय् अध्यक्ष लगायत मेपिं प्यम्ह दुजःत नं दयेमाःगु खः । तर सरकारं आः तक थ्व दुजःत नियुक्त मयाःनि । थारू आयोगया अध्यक्ष बिष्णु प्रसाद चौधरीं सरकारं मेपिं प्यम्ह दुजःत नियुक्त मयाःगुलिं आयोगं छुं नं ज्या याये मफयाच्वंगु खँ कनादीगु दु । थुकिं यानाः आयोग दुसां उकिं सम्बद्ध समुदायया हितय् छुं हे ज्या याये फयाच्वंगु मदु ।
सरकारं अध्यक्ष छम्ह जक नियुक्त यानाः मेपिं दुजःत नियुक्त मयाःगु खँय् असन्तुष्टि प्वंकुसें राष्ट्रिय समावेशी आयोगया अध्यक्ष शान्तराज सुवेदीं वंगु वालय् राजीनामा समेत बियादीगु खः । वय्कःया राजीनामा लिपा समावेशी आयोग शून्य जूगु दु । अन छुं कर्मचारीयात ज्या मयासे तलब जक नका तःगु दु ।
उखे निदँ न्ह्यः हे अध्यक्ष लगायत सकलें पदाधिकारीतय्गु म्याद फूगु खःसां आः तक नियुक्ति याये मफयाः राष्ट्रिय महिला आयोग व दलित आयोग निगुलिं नं खाली जुयाच्वंगु दु । अन सरकारं न्हियान्हिथंया ज्या यायेगु लागिं सचिव सचिव छुं कर्मचारीत तयातःगु दु । तर आयोगया पदाधिकारीत सुं मदुगु जुयाः कर्मचारीं छुं नं महत्वपूर्ण निर्णय याये फयाच्वंगु मदुनि ।
सरकारं राष्ट्रिय आदिवासी जनजाति आयोग गठन याःगु खःसा उकिया अवस्था नं अथे हे जुयाच्वंगु दु । अथे हे स्वदँ न्ह्यः गठन याःगु भाषा आयोगय् नं छम्ह अध्यक्ष व छम्ह सदस्य नियुक्त यानाः अथें वांछ्वयातःगु दु । थुकिं यानाः भाषा आयोगं नं खास हे ज्या याये फयाच्वंगु मदुनि ।
देशय् थीथी जातीय समुदाययात अधिकारसम्पन्न यायेगु लागिं उमिगु लागिं बिस्कं आयोग गठन यायेगु खँ संविधानय् व्यवस्था यानातःसां सरकारं धाःसा उकियात ध्यान मबिउगु द्वपं सम्बद्ध समुदायं बियाहःगु दु ।
LEAVE YOUR COMMENTS