ने. सं. ११४४ ञलागा पारू -

माओवादी केन्द्रं पार्टी दुने सहलह यानाः जक मन्त्रीया नां बीगु

येँ –(नेकपा (एमाले) या अध्यक्ष केपी शर्मा ओलीं प्रधानमन्त्रीया सपथ ग्रहण यानादीगु दु । शीतल निवासय् जूगु छगू विशेष ज्याझ्वःया दथुइ राष्ट्रपति विद्यादेवी भण्डारीपाखें प्रधानमन्त्री ओलीं पद व गोपनीयताया सपथ कयादीगु खः ।राष्ट्रपति भण्डारीं म्हिगः सुथय् जक ओलीयात प्रधानमन्त्रीइ नियुक्त यानादीगु खः ।प्रधानमन्त्री शेरबहादुर देउवां म्हिगः सुथय् राष्ट्रया नामय् संबोधन यासें राष्ट्रपति भण्डारी समक्ष राजीनामा बीवं नेकपा (एमाले) या अध्यक्ष ओली व माओवादी (केन्द्र) अध्यक्ष पुष्पकमल दाहाल ‘प्रचण्डं’ ओलीयात प्रधानमन्त्री नियुक्त यायेगु पौ राष्ट्रपति कार्यालयय् बिउगु खः । वयां लिपा हे राष्ट्रपति भण्डारीं ओलीयात प्रधानमन्त्री नियुक्त याःगु खः।

सपथ ग्रहण लिपा प्रधानमन्त्री ओलीं स्वम्हेसिया मन्त्रिमण्डल नं गठन यानादीगु दु । प्रधानमन्त्री ओलीया सिफारिसय् राष्ट्रपति भण्डारीं लालबाबु पण्डित व थममाया थापायात मन्त्रीइ नियुक्त यानादीगु खः ।पण्डित जनसंख्या व वातावरण मन्त्री जुयादीगु दुसा थापा महिला बालबालिका व समाजकल्याण मन्त्री जुयादीगु दु । वय्कःपिं निम्हेसित नं राष्ट्रपतिं पद व गोपनीयताया सपथ ग्रहण यानादीगु दु । वय्कःपिं निम्हं एमालेया सांसद खः । ल्यं दुगु मन्त्रालय प्रधानमन्त्री ओली थःके हे तयादीगु दु ।उखे न्हूगु सरकारय् माओवादी केन्द्रपाखें धाःसा सुं नं मन्त्री जूगु मदुनि । पार्टी दुने सहलह जुयाच्वंगु व मन्त्रालयया भागबन्डाय् खँ मिले मजूगुलिं पार्टीपाखें मन्त्री जुइ पिनिगु नां मछ्वःगु खः ।

मधेसवादी दलतय्त नं आह्वान

एमाले व माओवादी जानाः गठन याःगु न्हूगु सरकारय् मधेसवादी दलतय्त नं सहभागी जुइत आह्वान याःगु दु । संसदय् दुथ्याःगु न्यागू राष्ट्रिय मान्यता प्राप्त दल मध्ये निगू मधेसवादी दल नं सरकारय् सहभागी जुल धाःसा सत्तापक्षयाके दुई तिहाई बहुमत दइगु खँ धयाहःगु दु । मधेसवादी दलतय्त नं सरकारय् सहभागी याकेगु लागिं आन्तरिक रुपं खँल्हाबल्हा जुयाच्वंगु दावी एमाले सूत्रं याःगु दु ।

मधेसवादी दलतय्सं धाःसा सरकारय् वनेगु लागिं संविधान संशोधनयात न्हापांगु शर्तया रुपय् न्ह्यःने हःगु दु । यदि एमाले व माओवादी थःपिंसं धाः थें संविधान संशोधन यायेत तयार जुल धाःसा थःपिं नं सरकारय् वने फइगु खँ संसफो सूत्रं धाःगु दु । संशोधनया लागिं माओवादी पूर्ण रुपं तयार दुसां एमालें धाःसा संशोधनया ‘औचित्य’ पुष्टि यायेमाः धयाच्वंगु दु ।