स्थानीय तहपाखें नागरिकता बीगु योजना

येँ – गृह मन्त्रालयं आः नागरिकता बीगु ज्या तकं स्थानीय तह मार्फत याकेगु योजना न्ह्यःने हःगु दु । म्हिगः सार्वजनिक याःगु गृह प्रशासन सुधार कार्ययोजनाय् थ्व खँ दुथ्याकातःगु खः । गृहमन्त्री बालकृष्ण खाँणं मन्त्रीया रुपय् कार्यभार कःघाःगु खुला लिपा म्हिगः
सिंहदरवारय् २०६ बुँदे प्रशासन सुधार कार्ययोजना–२०७८ सार्वजनिक यानादीगु खः ।

म्हिगः सार्वजनिक याःगु कार्ययोजनाय् गजि खेती व गजि छ्यलेगु सम्बन्धी मापदण्ड दयेकेगु निसें स्थानीय तहपाखें हे नागरिकता बीगु तकया योजना दुथ्याकातःगु दु । गजिया वासः दयेकेगु नितिं खुलाया दुने कार्यविधि तयार यायेगु खँ कार्ययोजनाय् दुथ्याकातःगु दु ।

उकथं हे अध्यागमन नीति तर्जुमा यानाः लागू यायेगु, निश्चित मापदण्ड पूवंकाः स्थानीय तहं नागरिकता बीगु, प्रहरीया सरुवा बढुवाय् नं न्हूगु मापदण्ड तयार यायेगु मन्त्रालयया योजना दु । नेपाल प्रहरी व सशस्त्र प्रहरी बलया संगठन व व्यवस्थापन सर्वेक्षण यायेगु योजना नं सार्वजनिक याःगु दु । लिसे लागू औषध नियन्त्रणया नितिं हरेक जिल्लाय् लागू औषध सचेतना केन्द्र सञ्चालन यायेगु मन्त्रालयया योजना दु ।