नेपालय् सरकार दयेकेगु भारतीय गृहमन्त्रीया अभिव्यक्ति !

येँ (नेपालभाषा टाइम्स)÷ भारतया गृहमन्त्री व सत्तारुढ दल भाजपाया नेता अमित शाहं नेपालय् नं थःपिंसं सरकार दयेकेगु धकाः बिउगु अभिव्यक्तियात कयाः नेपालं भारतया ध्यानकर्षण याःगु दु ।

भारतया निंतिं नेपाःया राजदूत निलाम्बर आचार्यं म्हिगः भारतीय विदेश मन्त्रालयया अधिकारीत नापलायेगु झ्वलय् थ्व ध्यानाकर्षण याकूगु खँ धाःगु दु ।

भारतया सत्तारुढ दल भाजपाया नेता शाहं सन् २०१८ य् नेपाः व श्रीलंकाय् नं सरकार दयेकेगु धकाः न्ववाःगु खँ भारतया हे त्रिपुरा राज्यया मुख्यमन्त्री विप्लव देवं छुं न्हि न्ह्यव छगू सार्वजनिक कार्यक्रमय् हे खुलासा यानाबिउगु खः । नेता शाहं उबलय् छगू आन्तरिक ज्याझ्वलय् ‘भारतय् जक मखु, नेपाः व श्रीलंकाय् नं सरकार दयेकेगु’ धकाः न्ववाःगु खँ मुख्यमन्त्री देवं खुलासा यानादीगु खः ।

यदि शाहं थ्व खँ धाथें न्ववाःगु खःसा थ्व तसकं आपत्तिजनक जूगु धासें नेपाःया राजदूत आचार्यं म्हिगः हे ध्यानाकर्षण याकादीगु खः । भारतीय विदेश मन्त्रालयया अधिकारीतय्सं धाःसा थ्व बारे सत्य छु खः धकाः थःपिंसं बुझे यानाच्वनागु लिसः बिउगु सीदुगु दु ।

मुख्यमन्त्री देवया धयादीगु खँयात कयाः गृहमन्त्री शाहं छुं प्रतिक्रिया बियादीगु मदुनि । मेखे भारतीय सञ्चार माध्यमं धाःसा शाहया बचाउलय् कुहां वःगु दु ।

शाहं उबलय् आन्तरिक ज्याझ्वलय् न्ववायेगु झ्वलय् भारतया राज्यय् जक मखु, नेपाः व श्रीलंकाय् नं पार्टी विस्तार यायेगु धकाः ख्याः याये थें जक न्ववाःगु धकाः सञ्चार माध्यमतय्सं च्वया हयाच्वंगु दु ।

अथें नं नेपालय् भारतं अप्रत्यक्ष रुपं हस्तक्षेप याना वयाच्वंगु अवस्थाय् सत्तारुढ दलया हे छम्ह जिम्मेवार नेतां थुकथं न्ववाःगु धयागु तसकं हे आपत्तिजनक व हेपे याःगु धाःसें नेपालय् धाःसा विरोध सुरु जूगु दु । सामाजिक सञ्जालय् नेपाःयात
शाहं तसकं हेपे याःगु धासें विरोध जुयाच्वंगु दु ।

भारतय् सत्ता न्ह्याकाच्वंगु भाजपा हिन्दूवादी पार्टी खः । भाजपां नेपालय् नं हिन्दू राज्य हयेमाः धयागु लबिङ यानाच्वंगु दु । थज्याःगु पार्टीया नेतां नेपाःया बारे थुकथं न्ववाःगु तसकं गम्भीर जूगु टिप्पणी जुयाच्वंगु दु ।

सम्बन्धित बुखँ

LEAVE YOUR COMMENTS