शिक्षासेवी सीताराम मास्के मंत

येँ – नेपाल कम्युनिष्ट पार्टीया पुलांम्ह कार्यकर्तालिसें शिक्षासेवी नापं निरंकुश पंचायती व्यवस्थाया विरोधी आन्दोलनया न्ह्यलुवा सीताराम मास्के मंत । शिक्षक संगठनया तकं न्ह्यलुवा जुयाच्वनादीम्ह मास्के वंगु शनिवाः न्हिनसिया ३ः३० ताःइलय् मदुगु खः । मस्तिष्कघातया कारणं वंगु लछि न्ह्यःनिसें वय्कः थनया अन्नपूर्ण न्यूरो अस्पतालय् वासः याकाच्वनादीगु खः ।

वय्कःया निम्हं काय अमेरिकाय् च्वनाच्वंगुलिं वय्कःया अन्त्येष्ठि थौं जक जुइगु खँ सीदुगु दु । थ्व स्वयां न्ह्यः वय्कःया सीम्ह नेपाल कम्युनिष्ट पार्टीया ज्याकू धुमवाराहीइ अन्तिम श्रद्धाञ्जलीया निंतिं तःगु खः । नेपाल राष्ट्रिय शिक्षक संगठनया संस्थापक कोषाध्यक्ष मास्कें सरकारी शिक्षकं सेवा निवृत्त जुयादी धुंकाः निजी शैक्षिक संस्था चायेकाः शिक्षा ख्यलय् सक्रिय जुयाच्वनादीगु खः । वय्कः जलजला शिशु सदनया संचालक खः ।