यँयाःया रथ व द्यःपिंत जीपीएस प्रणालीं कःघाइगु
येँ (नेपालभाषा टाइम्स)÷ येँ महानगरपालिकां यँयाः जात्रा व्यवस्थापन समितियात बीमाःगु ध्यबा थुगु यँयाः जात्राया झ्वलय् बीगु जूगु दु । वंगु २०७७ सालंनिसें जात्रा व्यवस्थापन समितियात बीमाःगु ध्यबा बीगु धकाः निर्णय जूगु खँ म्हिगः मनपां हनुमानध्वाखाया ल्वहं चुकय् याःगु पत्रकार सम्मेलनय् कंगु खः ।
२०७७ साल लिपा थीथी कारणं यानाः जात्रा व्यवस्थापन समितिया बी धाःगु ध्यबा बी मफयाच्वंगु खःसां थुगुसी बीगु निर्णय जूगु खँ येँ मनपाया प्रवक्ता लिसें १७ वडाया वडा अध्यक्ष नविन मानन्धरं कनादीगु खः । उकथं हे वय्कलं थुगु दँया नितिं बीमाःगु ध्यबा नं तत्काल निकास यायेगु खँ धयादीगु दु ।
उकथं हे थुगुसी जात्राया झ्वलय् श्री कुमारी, श्री गणेश, श्री भैरवया लिसें लाखे आजु, पुलुकिसि, सवःद्यःयात नं जीपीएस प्रणालीं कःघाइगु जूगु दु । जीपीएसय् कःघायेधुंकाः रथ गन थ्यनाच्वन, लाखे, पुलुकिसि व सवःद्यःया प्याखं गन हुइकाच्वन धइगु जानकारी कायेफइगु खँ प्रवक्ता नविन मानन्धरं कनादिल ।
जीपीएसय् कःघायेधुंकाः रथ यात्राया लिसें थीथी द्यःया प्याखं स्वइपिं सर्वसाधारण जनता व स्थानीय जनतायात पुजा यायेगु नितिं व्यवस्थापन यायेत नं अःपुइगु खँ धाःगु दु । थगुने नं येँ मनपां रथय् गल्लि म्याप छ्यःगु खःसा थुगुसी मेपिं द्यःयात नं म्यापय् दुथ्याकीगु जूगु दु ।
उकथं हे यःसिं थनिकुन्हु यःसिं थनेधुंकाः महाद्यः–पार्वती दबुलिइ ‘दबू रिभाइभ’ ज्याझ्वः अन्तर्गत मौलिक गायन, वादन लिसें प्याखं हुइकेगु ज्याझ्वः येँ मनपां याइगु जूगु दु । उगु ज्याझ्वलय् सछि स्वयां अप्वः कलाकारतय्सं न्हिछियंकं ज्याझ्वः न्ह्यब्वइ । ज्याझ्वलय् नेपाल प्रहरी व गुर्जुया पल्टनया नं सांगीतिक ज्याझ्वः दइगु खँ धाःगु दु ।
येँ महानगरपालिका सम्पदा तथा पर्यटन समितिया संयोजक लिसें वडा ८ या वडा अध्यक्ष आशामान संगतया सभापतित्वय् जूगु उगु पत्रकार सम्मेलनय् येँ मनपाया उपमेयर सुनिता डंगोल व यँयाः जात्रा व्यवस्थापन समितिया अध्यक्ष गौतमरत्न शाक्यं नं नुगःखँ तयादीगु खः ।
LEAVE YOUR COMMENTS