च्वमि महर्जनया निगू कृति पिदन

येँ – बुद्ध धर्म व दर्शनया ख्यलय् ताःई न्ह्यवंनिसें कलम न्ह्याका वयाच्वंम्ह च्वमि वसन्त महर्जनया निगू कृति बजारय् वःगु दु । च्वमि महर्जनया ‘बुद्ध व मानवअधिकार’ व ‘उत्तरी नेपालय् बौद्ध धर्म’ नांया निगू सफूया विमोचन वंगु छुं दिं न्ह्यः जूगु खः । उगु सफू राष्ट्रिय मानवअधिकार आयोगया पुलांम्ह दुवः गौरी प्रधान, त्रिभुवन विश्वविद्यालय सांस्कृतिक विभागया प्रा. डा. प्रेम खत्री व डा. सुरेन्द्रमान वज्राचार्यं मंकाःकथं विमोचन यानादीगु खः ।

ज्याझ्वलय् नवासें प्रधानं सफुतिइ मानव अधिकारया प्यंगू विषययात कःघानातःगु खँ कनादिसें बुद्धया आदर्श व दर्शनपाखें हे मानव अधिकारया घोषणापत्र तर्जुमा जूगु खँ न्ह्यथनादिल । डा. खत्रीं संस्कृति विधा म्हो हे जक च्वमिपिंसं च्वइगु विधा जूसां नं विमोचन जूगु सफू न्हू पुस्ताया निंतिं बुद्ध धर्मया बारे ज्ञान हस्तान्तरण यायेत ग्वाहालि जुइगु विश्वास प्वंकादिल ।

डा. वज्राचार्यं बुद्ध दर्शन व बुद्धया विचाःयात सीकेत इच्छुकपिनिगु निंतिं निगुलिं सफू छगू दस्तावेजया रुपय् न्ह्यःने वःगु चर्चा यानादिल । च्वमि महर्जनं बुद्ध व मानवअधकिार सफूतिइ मानव अधिकार, बुद्ध व मानवअधिकारया व्यवस्था, बौद्ध नैतिकताया विषयय् खँ ल्ह्वनागु व उत्तरी नेपालय् बौद्ध धर्म सफुतिइ बौद्ध धर्मया इतिहास, सामाजिक जनजीवन, गुम्बा व उकिया व्यवस्थापन, तिब्बतय् बौद्ध धर्मया विकास लगायतया विषययात न्ह्यथना तयागु जानकारी बियादिल ।