प्लाष्टिक कम्पनी व वाउँगु स्टीकर मदुगु सवारीयात प्रतिबन्ध

ख्वप – सरकारं आः प्लाष्टिक कम्पनी व वाउँगु स्टीकर मदुगु सवारी साधनयात कारवाही याइगु जूगु दु । अथे हे ध्वमगिगु प्लाष्टिक उत्पादन याइगु कम्पनीयात प्रतिबन्ध तइगु जूगु दु ।जनसंख्या व वातावरणमन्त्री लालबाबु पण्डितं ध्वमगिगु प्लाष्टिक उत्पादन याइगु कम्पनीयात प्रतिबन्ध तयेगु नापं ध्वमगिकथं खाद्यान्न लगायत बट्टा दुने बन्द सामान व ध्वमगिगु प्लाष्टिक कम्पनीयात उत्पादनय् प्रतिबन्ध तयेगु धयादीगु खः ।

थन जूगु छगू ज्याझ्वलय् नवासें मन्त्री पण्डितं वइगु बैशाख १ गते निसें लागू जुइकथं महानगर व उपमहानगरपालिका लागाय् वाउँगु स्टीकरण मदुगु सवारी साधनयात नं प्रतिबन्ध तयेगु धयादिल । अथे हे वातावरणयात ध्यानय् मतसे कानुनतकं हाचां गायाः संचालन जुयाच्वंगु अगःयात वातावरणमैत्री यायेगु व गलत धंगं संचालन जुयाच्वंगु अगःयात कारवाहीया दायराय् हयेगु नं वय्कलं धयादीगु दु । थुकथं हे छगू थासय् उद्योग कारखाना संचालनया निंतिं दर्ता यायेगु तर मेगु हे थासय् वनाः संचालन यानाः वातावरण स्यंकीपिंत नं कारवाही याइगु जूगु दु ।