सावित्रा भण्डारी फ्रान्सया क्लबय्

येँ (नेपालभाषा टाइम्स)- नेपाः राष्ट्रिय मिसा फुटबलया नांजाम्ह कासामि सावित्रा भण्डारी ‘साम्बा’ यात फ्रान्सया शीर्ष डिभिजन क्लबं अनुबन्ध याःगु दु । साम्बायात फ्रेन्च क्लब एना भान गुइनगाम्पं अनुबन्ध याःगु खः । थ्वलिसें साम्बा युरोपेली फुटबलया शीर्ष क्लब म्हितूम्ह न्हापांम्ह नेपाःया कासामि जूगु दु ।

साम्बा एसियन राष्ट्र जूसां युरोपेली लिग म्हितीगु इजरायलया क्लब हापोएल रानानां म्हितेधुंकूम्ह कासामि खः । इजरायल व हमासया दथुइ युद्ध जुइवं सावित्रा इजरायलं नेपाः लिहां वःगु खः । सावित्रायात अनुबन्ध याःगु फ्रेन्च क्लब एना भान गुइनगाम्पं फ्रान्सया मिसा लिग वानय् थौंकन्हय् झिगूगु थासय् दु ।

सावित्रा भण्डारी सन् २०२२–२३ य् भारतीय लिग नं म्हितूगु खःसा साम्बां म्हितूगु क्लब गोकुलम केरलां उपाधि नं त्याकूगु खः । उगु सिजनय् साम्बां १० गू कासा म्हिताः २९ गू गोल याःगु खःसा भारतीय मिसा लिगय् आःतक दकलय् अप्वः गोल याःम्ह कासामि नं जूगु खः । साम्बा भारतीय लिगया स्वंगू सिजन म्हितूगु दुसा स्वंगुलिं सिजनय् उपाधि नं त्याकूगु खः ।

सावित्रा भण्डारी ‘साम्बां’ नेपाःया निंतिं आःतक ४२ गू कासा म्हितूगु दुसा नेपाःया निंतिं ४३ गोल यायेधुकूगु दु । साम्बा एपीएफया कासामि नं खः ।