फेसबुकय् ह्याकरतय् आक्रमण

सामाजिक सञ्जाल फेसबुकया थ्यंमथ्यं स्वंगू करोड प्रयोगकर्तातय् व्यक्तिगत विवरण ह्याकरतय्सं ह्याक याःगु खँ पिहां वःगु दु । फेसबुकं छुं ई न्ह्यव तिनि थः न्यागू करोड प्रयोगकर्तातय् विवरण ह्याकरतय् पहुँचय् दुगु खँ धाःगु खः । तर आः फेसबुकं निगू करोड ९० लाख प्रयोगकर्तातय् व्यक्तिगत विवरण जक ह्याकरतय्सं खुयाकायेत सफल जूगु खँ धाःगु दु ।

फेसबुकया उपाध्यक्ष गाए रोसेनं धाःगु दु, ‘जिमिसं नकतिनि सिइका कथं सोचे यानागु स्वयां म्हो जक प्रयोगकर्तातय्थाय् ह्याकरत थ्यंगु लानाच्वन ।’वय्कलं म्हमसिउपिं मनूतय्सं थ्यंमथ्यं छगू करोड ५० लाख फेसबुक प्रयोगकर्तातय् नां, फोन नम्बर व इमेल ठेगाना खुया कायेधुंकूगु दु । अथेहे मेपिं छगू करोड ४० लाख प्रयोगकर्तातय् विवरण नं जोखिमय् दु ।

फेसबुकया कथं ह्याकरतय्सं फेसबुक प्रयोगकर्तातय् लिंग, धर्म, गृहनगर, जन्ममिति, थाय्बाय् व नकतिनि चाःहिलावःगु थाय् विवरण नं मुंकूगु दु । तर थ्व साइबर आक्रमणं फेसबुकं हे संचालन याना वयाच्वंगु मेसेन्जर, मेसेन्जर किड्ज, इन्स्टाग्राम, ह्वाट्सएप, ओक्युलस, वर्कप्लेस, पेजेज, पेमेन्टय् धाःसा लिच्वः मलाकूगु खँ नं धाःगु दु ।