काय सिबें म्ह्याय् बुइगु क्रम म्हो जुया वन

येँ -नेपालय् दँय्दसं धइथें म्ह्याय् बुइगु क्रम म्हो जुयावंगु खँ सीदुुगु दु । थुकिं यानाः मिजं व मिसाया दथुइ जनसांख्यिक अन्तर अप्वये फइगु चिउताः मिसा अधिकारया सम्बन्धय् ज्या याइपिंसं प्वंकाहःगु दु । राष्ट्रिय जनगणना २०६८ या तथ्यांक कथं मुक्कं जनसंख्या स्वयेबलय् मिसापिनिगु जन्मदर अप्वः दुगु खः । तर झिंप्यदँ स्वयां क्वय्यापिनिगु तथ्यांक स्वयेबलय् धाःसा म्ह्याय् स्वयां काय्या जन्मदर अप्वया वंगु दु । मिसा अधिकारवादीतय् कथं वंगु झिदँया दुने मिसा मचा बुइगु क्रम म्हो जुयाच्वंगु दु ।

नेपालय् म्ह्याय् बुइगु म्हो जुइगु क्रम नीदँ न्ह्यवंनिसें जुयाच्वंगु खःसा आः वयाः धाःसा थ्व क्रम तच्वया वनाच्वंगु दु । थुकथं म्ह्याय् बुइगु म्हो जूगुया मू कारण धइगु काय् बुइकेमाः धइगु पितृसत्तात्मक मान्यता जूगु खँ अधिकारकर्मीपिंसं धाःगु दु । थौंकन्हय् विशेष यानाः नेपाःया तराई लगायत ग्रामिण भेगय् म्ह्याय्या म्हो जन्म जुयाच्वंगु दु । पित्तृसत्तात्मक सोचया कारण आपालं धइथें मिसापिंसं थःगु प्वाथय् म्ह्याय् दु धइगु सीवं गर्भपतन याइगु घटना नं अप्वया वंगु दु । थौंकन्हय् नेपालय् सुरक्षित गर्भपतन यायेगु निंतिं आधिकारिक संस्था व तालिम कयातःपिंसं याये फइगु व्यवस्थाया कारणं थ्व समस्या अप्वया वनाच्वंगु खँ धाःगु दु ।

नेपाःया हे थीथी सरकारी अस्पतालय् म्ह्याय् मस्त बुइगु क्रम म्हो जुया वनाच्वंगु खँ अस्पतालया तथ्यांकं नं क्यनाच्वंगु दु । परोपकार प्रसुति गृह थापाथलीया कथं २०७५÷७६ स अन ११,९४६ म्ह काय् बूगु खःसा १०,४१६ म्ह जक म्ह्याय् बूगु खः । प्रशुति गृहया कथं वंगु झिदँ न्ह्यवंनिसें काय् बुइगु स्वयां म्ह्याय् बुइगु यक्व हे म्हो जुयाच्वंगु दु । आःया जनगणनाय् थ्व तथ्यांक अझ प्रस्ट जुइगु अनुमान दु ।उकथं हे ख्वपया सिद्धि मेमोरियल अस्पतालय् वंगु दँय् २१९ म्ह काय् बूगु खःसा म्ह्याय् १८४ म्ह जक बूगु दु । विज्ञतय् कथं थ्वहे अनुपातय् म्ह्याय् बुइगु क्रम जारी जुल धाःसा छुं दशक लिपा वैवाहिक सम्बन्धया सन्तुलन समेत स्यनीगु अवस्था वयेफु ।

तर नेपाल सरकारं सामाजिक रुपं ब्वलनेफइगु थज्याःगु समस्यायात कयाः आः तक छुं कथंया चिउताः धाःसा काःगु मदुगु जक मखु नेपालय् जनसंख्याय् मचा बुइगु अनुपात छु गथे जुयाच्वन धइगु तथ्यांक तकं मदुगु खँ धाःगु दु ।

सम्बन्धित बुखँ

LEAVE YOUR COMMENTS